સીટી-એ પોલીસ દ્વારા તપાસ કરાવાતા ડાયરેકટ જોડાણ ખુલ્યું : વિજ કંપની દ્વારા અઢી લાખનો દંડ ફટકારાયો

જામનગર સીટી-એ ડીવીઝન પોલીસ સ્ટેશન વિસ્તારમાં ગેંગરેપની ઘટના સામે આવી હતી જેમાં આરોપીઓને પકડી જેલ હવાલે કરવામાં આવ્યા છે, દરમ્યાન પકડાયેલ આરોપીના રહેણાંક મકાનોમાં પોલીસ દ્વારા તપાસ કરાવાતા પીજીવીસીએલના ચેકીંગ કાર્યવાહીમાં વિજચોરી થતી હોવાનું જાણમાં આવ્યુ હતું આથી અઢી લાખનો દંડ ફટકારી મજકુર વિરુઘ્ધ ફરીયાદની તજવીજ હાથ ધરવામાં આવી હતી.

જામનગર સીટી-એ ડીવીઝન પોલીસ સ્ટેશનમાં તાજેતરમાં યુવતિ પર સામુહિક દુષ્કર્મનો બનાવ સામે આવ્યો હતો જેમાં આરોપી હુશેન ઉર્ફે હુશેન વાઘેર ગુલમામદ શેખ (ઉ.વ.40) રહે. ઘાંચીની ખડકી બહાર ઢોકડકાંઠો, જામનગરના અલગ અલગ રહેણાંક મકાનોએ તપાસ દરમ્યાન જાણવા મળેલ કે આરોપીના ભોગવટાવાળા અલગ અલગ મકાનોમાં પીજીવીસીએલનુ મીટર લગાવેલ નથી.

જે બાબતે એસપી પ્રેમસુખ ડેલુ, ડીવાયએસપી જે.એન. ઝાલાના માર્ગદર્શન મુજબ સીટી-એ ડીવીઝન પીઆઇ એન.એ. ચાવડા તથા સર્વેલન્સ સ્ટાફની ટીમ તેમજ પીજીવીસીએલના અધિકારી અને સ્ટાફ સાથે આરોપીના ઘાંચી ખડકીએ આવેલા બે મકાનોમાં તેમજ સિલ્વર પાર્ક સોસાયટીમાં આવેલ એક મકાન અને પંચેશ્ર્વર ટાવર પાસે આવેલ મકાનમાં ચેક કરતા તમામ મકાનોમાં પીજીવીસીએલનું મીટર લગાવેલ ન હોય અને વિજ થાંભલામાંથી ડાયરેકટ કનેકશન મેળવેલનું સામે આવ્યુ હતું.

આથી પીજીવીસીએલના અધિકારીઓએ કાયદેસરની કાર્યવાહી કરી તમામ ઘરના વિજ જોડાણ કાપી નાખેલ છે અને આશરે 2.50 લાખનો દંડ ફટકારી મજકુર વિરુઘ્ધ ફરીયાદ કરવાની તજવીજ હાથ ધરવામાં આવી હતી.