અવરજવર માટે 10-15 કિલોમીટરનો લાંબો ફેરો કરવો પડે છે: કામચલાઉ ડાયવર્ઝન બનાવી આપવા તંત્રને રોષભેર રજૂઆત

ખંભાળિયાના પાદરમાં પોરબંદર માર્ગ પર આવેલો રજવાડાના સમયનો કેનેડી બ્રિજ (ખામનાથ પુલ) છેલ્લા જર્જરિત બની ગયો હોવાના કારણે છેલ્લા ઘણા સમયથી વાહન ચાલકો- રાહદારીઓ માટે સંપૂર્ણપણે બંધ કરી દેવામાં આવ્યો છે. આ પુલ બંધ કરાતા અને વૈકલ્પિક રસ્તો ન હોવાથી મોટી સંખ્યામાં વાહન ચાલકો તેમજ આ વિસ્તારના રહીશોને વ્યાપક હાલાકી થતી હોવા અંગે તંત્રને લેખિત રજૂઆત કરવામાં આવી છે.

ખંભાળિયામાં ખામનાથ મંદિર પાસે આવેલો અને આશરે 120 વર્ષ જૂનો કેનેડી બ્રિજ (ખામનાથ પુલ) ખૂબ જ જર્જરિત બની ગયો હોવાથી તંત્ર દ્વારા આ પુલને જોખમી ગણાવી અને અવરજવર માટે સંપૂર્ણપણે બંધ કરી દેવામાં આવ્યો છે. આશરે છ એક માસ કરતા વધુ સમયથી આ પુલ લોકો માટે બંધ કરાવી દઈ, આ વિસ્તારમાં અવાર-જવર માટે વૈકલ્પિક રસ્તો જાહેર કરવામાં આવ્યો છે.

આ વિસ્તારમાં આવવા તથા જવા માટે કણજાર ચોકડી પાસેથી ભાણવડ પાટિયા થઈને રામનાથ મંદિર પાસેથી અવાર-જવર કરવી પડે છે. આ ફેરો વાહન ચાલકોને 10 થી 15 કિલોમીટરનો થઈ જતો હોવાથી લોકોને વ્યાપક મુશ્કેલી વેઠવી પડે છે. આટલું જ નહીં, અહીં રહેતા લોકોને પોતાના સંતાનોને સ્કૂલે તેમજ ટ્યુશને તેડવા- મુકવા જવામાં પણ ભારે હાલાકીનો સામનો કરવો પડે છે. મહદંશે બાળકોને તેના માતાઓ જ તેડવા-મુકવા જતા હોય, નાના વાહનોમાં અકસ્માતનો પણ ભય સતાવે છે. આ વચ્ચે મહત્વની બાબત તો એ છે કે ખામનાથ બ્રિજ વિસ્તારમાં આવેલા દુકાનદારોના ધંધા ભાંગી ગયા હોય, તેઓને પણ વ્યાપક નુકસાનીનો સામનો કરવો પડે છે.

આ વિસ્તારમાં અવાર-જવર માટે રેલવે ફાટક તેમજ મોટા વાહનોની અવરજવર હોય, વિકટ પરિસ્થિતિમાં લોકોને રાહત થાય તે માટે કેનેડી બ્રિજ પાસે સિમેન્ટ કોંક્રેટનું કામ ચલાઉ ડાયવર્ઝન બનાવી આપવામાં આવે તે માટે આ વિસ્તારના રહીશો, દુકાનદારો દ્વારા સંયુક્ત સહીઓ સાથે જિલ્લા કલેકટરને લેખિત આવેદન પત્ર પાઠવવામાં આવ્યું છે. આ મહત્વના પ્રશ્નનું તાકીદે નિરાકરણ લાવવા તંત્રને રજૂઆત કરાઈ છે.