ભાવનગર શહેરના હાદાનગરમા એકલા રહેતા સગીરના હાથમાંથી આજ વિસ્તારમાં રહેતો એક શખ્સ મોબાઈલ ઝૂંટવી ફરાર થઈ જતા સગીરે બોરતળાવ પોલીસ મથકમાં ફરિયાદ નોંધાવી હતી. જે ફરિયાદના આધારે બોરતળાવ પોલીસે શખ્સને ગણતરીની કલાકોમાં ઝડપી લીધો હતો.

આ બનાવ અંગે જાણવા મળતી માહિતી અનુસાર ભાવનગર શહેરના હાદાનગર વિસ્તારમાં એક સગીરના હાથમાંથી મોબાઈલ ફોન ઝુંટવી શખ્સ ફરાર થયો હતો. હાદાનગરમાં આવેલ શિવશક્તિ સોસાયટી પ્લોટ નંબર 123 માં રહેતો અરમાન અલારખ મહેતર (ઉં.વ. 16) પોતાના ઘર નજીક વિસ્તારમાં આવેલ ડોક્ટર ખાનના દવાખાના બહાર ઓટલા ઉપર બેઠો હતો. તે દરમિયાન આ જ વિસ્તારમાં રહેતો અજય કાળુભાઈ ડાભી નામનો શખ્સ આવ્યો હતો. અને સગીરના હાથમાં રહેલો એન્ડ્રોઇડ મોબાઈલ ફોન કિંમત રૂપિયા 5,000 નો ઝુંટવી ફરાર થઈ જતા સગીરે અજયનો પીછો કર્યો હતો. અને થોડી દૂર જતા આ ઉઠાવગીર હાથમાં આવતા અજય સગીર સાથે ઝપાઝપી કરી ધક્કો મારી પછાડી દઈ મોબાઈલ ફોનની લૂંટ ચલાવી ફરાર થઈ ગયો હતો. બનાવ મામલે બોરતળાવ પોલીસ સ્ટેશનમાં અજય ડાભી (રહે.શિવશક્તિ સોસાયટી શેરી નંબર ત્રણ) વિરુદ્ધ ફરિયાદ નોંધાવતા પોલીસે ગુનો નોંધી વધુ તપાસ હાથ ધરી છે.

જે ઘટનાને પગલે બોરતળાવ પોલીસે ગણતરીની કલાકોમાં જ સગીરના હાથમાંથી મોબાઈલ ઝુંટવી જનાર શખ્સને ઝડપી લીધો હતો. બોરતળાવ પોલોસે અજય કાળુભાઇ ડાભી નામના શખ્સને ઝડપી લઇ ધોરણસરની કાર્યવાહી હાથ ધરી હતી.