૭૪ હજારની નુકસાની કરતા શખ્સ સામે ફરિયાદ : અગાઉની ફરિયાદનો ખાર રાખી ડેરી સંચાલકને ધમકી
ભાણવડથી આશરે ૨૦ કિલોમીટર દૂર રાણપર ગામે રહેતા અને દૂધની ડેરી ચલાવતા રામભાઈ કેશુભાઈ ઓડેદરા નામના ૩૨ વર્ષના મેર યુવાન તેમજ આરોપી શકદાર ઈસમ એવા રાણપર ગામના સામત ભુરાભાઈ રાણાવાયાના પરિવાર વચ્ચે જમીનના રસ્તા બાબતે ઘણા સમયથી મન દુ:ખ ચાલતું આવતું હતું. જેથી આશરે બે મહિના પહેલા આરોપી શકદાર શખ્સ દ્વારા ફરિયાદી રામાભાઈ ઓડેદરાની ડેરીમાં ચોરી કરવામાં આવી હોવા અંગેની ફરિયાદ કરવામાં આવી હતી.
આ પછી પોતાના વિરુદ્ધ કરવામાં આવેલી ચોરીની ફરિયાદ પરત ખેંચી લેવા તેમજ ડેરી બંધ કરી દેવાનું કહી, રામભાઈ મેરને જાનથી મારી નાખવાની ધમકી આપ્યાની તેમજ તેમની ડેરીમાં અપપ્રવેશ કરીને ડેરીમાં રાખવામાં આવેલું રૂપિયા ૧૫,૦૦૦ની કિંમતનું કોમ્પ્યુટર, ૫,૦૦૦ ની કિંમતનું પ્રિન્ટર, ૪૨,૦૦૦ની કિંમતનું ફેટ મશીન, ૬,૦૦૦ની કિંમતનું સ્ટ્રીરર, ૫૫૦૦ની કિંમતનો વજન કાંટો, કપાસિયાની ગુણી વિગેરે કોઈ જ્વલનશીલ પદાર્થ છાંટીને સળગાવી નાખતા આ ડેરીમાં કુલ ૭૪,૧૦૦નું નુકસાન થયાનું જાહેર થયું છે.
આ બનાવ અંગે ભાણવડ પોલીસે સામત ભુરાભાઈ રાણાવાયા સામે આઈપીસી કલમ ૪૨૭, ૪૩૬, ૪૫૪, ૪૫૭, ૫૦૪ ૫૦૬ (૨) તથા જી.પી. એક્ટની કલમ હેઠળ ગુનો નોંધી, આગળની તપાસ પી.એસ.આઈ. કારાવદરા દ્વારા હાથ ધરવામાં આવી છે.
***
ઓખામાં યુવાનને મારી નાખવાની ધમકી: ત્રણ સામે રાવ
ઓખાના મારુતિ નગર વિસ્તારમાં રહેતા અયુબભાઈ હનીફભાઈ સંઘાર નામના ૨૮ વર્ષના યુવાનને આ જીતેશભા, સીદીયાભા, તથા અન્ય એક શખ્સ મળી ત્રણ શખ્સોએ હાથમાં પહેરેલા કળા વડે માર મારી, ઇજાઓ કર્યાની તથા બિભત્સ ગાળો કાઢીને જાનથી મારી નાખવાની ધમકી આપ્યાની ફરિયાદ ઓખા મારીને પોલીસ મથકમાં નોંધાવવામાં આવી છે. જે અંગે પોલીસે જુદી જુદી કલમ હેઠળ ગુનો નોંધી, આગળની કાર્યવાહી હાથ ધરી છે.