ગઈકાલે વિઘ્નહર્તાની વિદાય સાથે ચોમાસાની વિદાયનો પ્રારંભ થયો છે, આજે વ્હેલી સવારે જિલ્લાના ગ્રામ્ય પંથકમાં ઝાકળ જોવા મળી હતી.

સમગ્ર જિલ્લામાં ચોમાસાની શરૂઆતમાં સટાસટી બોલાવી મેઘરાજાએ નદી-નાળા છલોછલ કરી દીધા બાદ શ્રાવણ માસમાં વાછટ જ આપી હતી અને ચાલુ માસ ભાદરવામાં પણ છુટોછવાયો વરસાદ નોંધાયો છે.

આજે વહેલી સવારે જિલ્લાના ગ્રામ્ય પંથકમાં ઝાકળ જોવા મળી હતી,જેથી એમ કહી શકાય કે ચોમાસાની વિદાયનો પ્રારંભ થયો છે,જામનગર કંટ્રોલ રૂમના જણાવ્યા અનુસાર આજે મહતમ તાપમાન ૩૪.૫ અને લઘુતમ તાપમાન ૨૬.૬ નોંધાયું છે.

સમગ્ર જિલ્લામાં મિશ્ર વાતાવરણ અનુભવાઈ રહ્યું છે બપોરે ભાદરવાનો સખત તડકો,ગરમી સવારે તેમજ સમી સાંજે ઠંડુ વાતાવરણ જોવા મળી રહ્યું છે. શહેરમાં પવન ગતિ ૨૫  થી ૩૦ તેમજ હવામાં ભેજનું પ્રમાણ ૮૮ ટકા નોંધાયું છે.