ભારતનો મોસ્ટ વોન્ટેડ ભાગેડુ હીરા વેપારી હાલમાં યુરોપિયન દેશ બેલ્જિયમમાં છે. પંજાબ નેશનલ બેંક લોન છેતરપિંડી કેસમાં ભારતીય એજન્સીઓ તેને શોધી રહી છે. બેલ્જિયમના વિદેશ મંત્રાલયે મેહુલ ચોક્સીની દેશમાં હાજરીની પુષ્ટિ કરી છે અને કહ્યું છે કે તેઓ તેનાથી વાકેફ છે અને તેને ખૂબ મહત્વ અને ધ્યાન આપે છે. અહેવાલમાં જણાવાયું છે કે બેલ્જિયન એફપીએસ ફોરેન અફેર્સ આ મહત્વપૂર્ણ મામલામાં તેના પર નજીકથી નજર રાખી રહ્યું છે.

અહેવાલ મુજબ, ભારતીય અધિકારીઓએ ચોક્સીના પ્રત્યાર્પણની પ્રક્રિયા શરૂ કરવા માટે તેમના બેલ્જિયન સમકક્ષોનો સંપર્ક કર્યો છે. ચોક્સીનો ભત્રીજો નીરવ મોદી, જે આ જ કેસમાં સહ-આરોપી છે, તેની લંડનથી પ્રત્યાર્પણની રાહ જોવાઈ રહી છે. 65 વર્ષીય ચોક્સી, પંજાબ નેશનલ બેંકમાં 13,500 કરોડ રૂપિયાના લોન છેતરપિંડીના કેસમાં નીરવ મોદી સાથે વોન્ટેડ છે. મેહુલની પત્ની પ્રીતિ ચોક્સી બેલ્જિયમની નાગરિક છે, જેની સાથે તે હાલમાં એન્ટવર્પમાં રહે છે.

અહેવાલો કહે છે કે મેહુલ ચોકસીએ બેલ્જિયમનું એફ રેસિડેન્સી કાર્ડ મેળવી લીધું છે. ચોક્સી સારવાર માટે એન્ટિગુઆ અને બાર્બુડા છોડીને ગયો હતો. જોકે, તે ટાપુ રાષ્ટ્રનો નાગરિક બન્યો છે. કેરેબિયન દેશના વિદેશમંત્રી ઇપી ચેત ગ્રીને, જ્યારે તેઓ તાજેતરમાં રાયસીના ડાયલોગમાં ભાગ લેવા માટે ભારતની મુલાકાતે આવ્યા હતા, ત્યારે તેમણે કહ્યું હતું કે મેહુલ ચોકસી એન્ટિગુઆ અને બાર્બુડામાં નથી.

ગ્રીને કહ્યું હતું કે મેહુલ ચોકસી સારવાર માટે ગયો હતો. જોકે, તેમણે તે ક્યાં છે તે જાહેર કર્યું નથી. પીએનબી કૌભાંડ પ્રકાશમાં આવ્યાના થોડા અઠવાડિયા પહેલા જાન્યુઆરી 2018 માં મેહુલ ચોકસી અને તેનો ભત્રીજો નીરવ મોદી ભારત છોડીને ભાગી ગયા હતા. કૌભાંડ બહાર આવ્યાના 2 મહિના પહેલા જ તેણે એન્ટિગુઆની નાગરિકતા લઈ લીધી હતી. મેહુલ ચોક્સીનો દાવો છે કે તેમની સામેના કેસ રાજકીય ષડયંત્રનું પરિણામ છે