દેશની સૌથી પ્રીમિયમ ટ્રેન ગણાતી વંદે ભારત ટ્રેનના ફૂડમાં કોકરોચ મળ્યા બાદ હોબાળો થયો હતો. એક યુગલ ભોપાલથી આગ્રા જતી ટ્રેનમાં મુસાફરી કરી રહ્યું હતું ત્યારે તેમને વંદો ધરાવતું ભોજન પીરસવામાં આવ્યું હતું. આ ફૂડની તસવીર પણ સોશિયલ મીડિયા પર વાયરલ થઈ રહી છે.દેશની સૌથી લક્ઝુરિયસ ટ્રેનોમાંની એક વંદે ભારત એક્સપ્રેસમાં મુસાફરી કરી રહેલા લોકોના ભોજનમાં કોકરોચ જોવા મળ્યા બાદ હોબાળો થયો હતો. એક યુગલ 18 જૂનના રોજ ભોપાલથી આગ્રા જતી વંદે ભારત એક્સપ્રેસમાં મુસાફરી કરી રહ્યું હતું ત્યારે તેમના ખોરાકમાં વંદો જોવા મળ્યો હતો. આ ભોજન આઈઆરસીટીસી દ્વારા ટ્રેનમાં આપવામાં આવ્યું હતું. દંપતીના ભત્રીજાએ સોશિયલ મીડિયા પર ઘટનાની માહિતી આપતા ફરિયાદ નોંધાવી હતી. તેણે આઈઆરસીટીસી સામે કાર્યવાહી કરવાની માંગ કરી છે. વિધિત વાર્શ્નેય નામના યુઝરે પોસ્ટ કર્યું કે કડક પગલાં લો અને ખાતરી કરો કે આવું ફરીથી ન થાય.

ટ્રેનના ફૂડમાં વંદો મળવાની આ પહેલી ઘટના નથી
વંદે ભારતના ખોરાકમાં વંદો દેખાયો છે. ફેબ્રુઆરીમાં, જ્યારે ડો. શુભેન્દુ કેશરી નામનો મુસાફર કટનીથી જબલપુર જંક્શન તરફ મુસાફરી કરી રહ્યો હતો, ત્યારે તેને આઈઆરસીટીસીદ્વારા પીરસવામાં આવતા ખોરાકમાં એક મરેલો વંદો જોવા મળ્યો હતો. ગયા વર્ષે જુલાઈમાં, ભોપાલ-દિલ્હી વંદે ભારત એક્સપ્રેસના એક મુસાફરના ખોરાકમાં કોકરોચ જોવા મળતાં રેલવેએ ખાદ્ય વિક્રેતા પર 25,000 રૂપિયાનો દંડ ફટકાર્યો હતો.

આઈઆરસીટીસીએ જવાબ આપ્યો
આઈઆરસીટીસીએ પણ આ મામલે પ્રતિક્રિયા આપી હતી. તેણે દંડ વસૂલવાની અને કડક કાર્યવાહી કરવાની વાત કરી. આઈઆરસીટીસીએ લખ્યું, ’દુવિધા માટે અમે માફી માગીએ છીએ. આ બાબતને ગંભીરતાથી લેવામાં આવી છે અને સંબંધિત સેવા પ્રદાતા પર યોગ્ય દંડ લાદવામાં આવ્યો છે. અમે ઉત્પાદન અને લોજિસ્ટિક્સ મોનિટરિંગ પણ કડક કર્યું છે.