છેલ્લે ૨૦૧૮માં યોજાયેલી પંચાયતોની ચૂંટણી સાથે આ વખતની ચૂંટણીના પરિણામોની સરખામણી કરીએ તો કોંગ્રેસે સાત નગરપાલિકા ગુમાવી છે. ચોરવાડમાં કોંગ્રેસના ધારાસભ્ય વિમલ ચુડાસમાનો પરાજય થયો છે. સૌરાષ્ટ્ર્રની પાલિકાઓની કુલ ૮૪૦ બેઠક પર ચૂંટણી યોજવામાં આવી હતી તેમાં ભાજપના ૬૧૧ કોંગ્રેસના ૧૨૭ અને ૮૩ અપક્ષ વિજેતા જાહેર થયા છે. ભાજપનો જોરદાર દેખાવ હોવા છતાં કુતિયાણામાં ભાજપના ૩૦ વર્ષના શાસનનો અતં આવ્યો છે. આવી રીતે સલાયામાં પણ ભાજપનો સફાયો બોલી ગયો છે અને એક પણ બેઠક તેને મળી નથી.
સૌરાષ્ટ્ર્રમાં ૩૦ નગરપાલિકાઓની ચૂંટણી યોજવામાં આવી હતી તેમાં ૨૬ માં ભાજપને સત્તા મળી છે. નગરપાલિકાઓની ૮૪૦ બેઠકમાંથી ૬૧૧ માં ભાજપના ઉમેદવારો વિજેતા થયા છે. કોંગ્રેસને ૧૨૭ બેઠકો મળી છે. ગત ટર્મમાં જે સાત નગરપાલિકાઓમાં કોંગ્રેસનું શાસન હતું તે પણ ગુમાવવું પડું છે. ૧૧ નગરપાલિકાઓ એવી છે કે ત્યાં કોંગ્રેસને એક પણ બેઠક મળી નથી. માંગરોળ નગરપાલિકામાં ટાઈ પડી છે. રાણાવાવ અને કુતિયાણા નગરપાલિકા સમાજવાદી પાર્ટીને મળી છે અને આ ચૂંટણીમાં ૮૩ અપક્ષો વિજેતા બન્યા છે.
દ્રારકા બાટવા રાજુલા જાફરાબાદ ચલાલા કોડીનાર નગરપાલિકાઓમાં તો તમામ બેઠકો પર ભાજપના ઉમેદવારોનો વિજય થયો છે અને આ તમામ નગરપાલિકાઓ વિરોધ પક્ષ વગરની બની ગઈ છે. કોંગ્રેસના ઉમેદવાર તો ઠીક, એક પણ અન્ય રાજકીય પક્ષના કે અપાક્ષ ઉમેદવારો અહીં વિજેતા બન્યા નથી.
બીજી બાજુ કોંગ્રેસે ભાણવડ રાજુલા ધોરાજી વિસાવદર વંથલી ચોરવાડ અને ભાયાવદર નગરપાલિકામાં તેમનું શાસન હતું તે ગુમાવ્યું છે.
માંગરોળ નગરપાલિકામાં ભાજપને ૧૧ અને કોંગ્રેસને ૧૫ બેઠકો મળી છે. અહીં કોણ સત્તાના સૂત્રો સંભાળશે તે નક્કી કરવામાં બસપાના ચૂંટાયેલા સભ્યોની ભૂમિકા મહત્વની બની રહેશે.