હાલ ગોંડલમાં માવતરના ઘરે રહેતી પરિણીતાએ ખડવંથલીના વતની પતિ અને સાસુ સસરા સામે શારીરિક માનસિક ત્રાસ આપ્યાની ફરિયાદ નોંધાવી છે.જાણવા મળતી વિગતો મુજબ, ગોંડલના ભગવતપરા વિસ્તારમાં માવતરના ઘરે રહેતી કૃપાલીબેન (ઉ.વ ૨૬) દ્વારા નોંધાવવામાં આવેલી ફરિયાદમાં આરોપી તરીકે ગોંડલના ખડવંથલીમાં રહેતા પતિ દર્શક, સસરા શશીકાંત નાગજીભાઈ ગીણોયા અને સાસુ શારદાબેનના નામ આપ્યા છે. પોતાની ફરિયાદમાં જણાવ્યું હતું કે, તેણીના લગ્ન ગત તારીખ ૨/૫/ ૨૦૨૩ ના ખડવંથલીના દર્શક સાથે થયા હતા. લગ્ન બાદ તેણી અને સાસરીયે જતા પતિએ બે-ત્રણ દિવસ સારી રીતે રાખ્યા બાદ નાની નાની વાતમાં ઝઘડાઓ કરતો હતો. આ બાબતે સાસુ શારદાબેન ને કહેતા તેણે કહ્યું હતું કે, આવું બધું હું પણ સહન કરતી તારા સસરા પણ મારી સાથે આવું જ કરતા મારા દીકરાનો સ્વભાવ જ આવો છે.


દરમિયાન પતિએ શંકા કુશંકા કરી ઝઘડો કરી પરિણીતાબે ધરાર ફીનાઇલ પીવડાવી વાળ પકડી માથું દીવાલ સાથે ભટકાડ્યું હતું અને જાનથી મારી નાખવાની ધમકી આપી હતી. સાસુ સસરા પણ નાની-નાની વાતમાં ઝઘડો કરી મેણાટોણા મારતા હતા.
પતિની બેંગલુરૂમાં નોકરી હોય જેથી પત્ની તેની સાથે રહેવા અહીં ગઈ હતી અહીં પણ પતિ રોજ ઝઘડા કરતો હતો અને કહેતો કે તારા માતા-પિતાના ઘરેથી ફ્રીજ,ટીવી તથા પૈસા લઇ આવ કહી દહેજની માંગણી કરતો હતો અને કહે તો કેમ મારે લગ્ન નહોતા કરવા પણ મારા મમ્મી પપ્પાએ તારી સાથે પરાણે લગ્ન કરાવ્યા છે તારે છુટાછેડા જોઈતા હોય તો બોલ કેટલા પૈસા જોઈએ છે.
​​​​​​​
પટેલ પરિણીતાએ પોતાની ફરિયાદમાં વધુમાં જણાવ્યું હતું કે, પતિ ડ્રગ્સ, દારૂ,ગાંજાનો વ્યસની હોય જેથી નશો કરી અવારનવાર ઝઘડાઓ કરતો હતો. તેમજ રાત્રિના પત્નીને એકલી મૂકી બહાર જતો રહેતો તથા તેણીના માતા પિતાને ફોન કરી ગાળો ભાંડતો હતો પતિના સીતમથી કંટાળી તેણીએ સાસુ-સસરાને કહ્યું હતું કે, હું ખડવંથલી આવી જવું છું પરંતુ સાસુ સસરાએ કહ્યું હતું કે, તું અહીં આવ તો અમારી આબરૂ શું તેમ કહી અહીં આવવાની ના કહી હતી.
ગત તારીખ ૧૬/૬/૨૦૨૩ ના પતિએ ફરી શંકા કુશંકા કરી ઝઘડો કરી તેણીનો ફોન પણ ફેંકી દીધો હોય અને જાનથી મારી નાખવાની ધમકી આપતા પરિણીતા અહીં બેંગ્લોરમાં તેના સગાના ઘરે જતી રહી હતી પતિએ ત્યાં પહોંચી પણ ઝઘડો કર્યો હતો. જેથી અંતે તેણી અહીં માવતરના ઘરે આવી ગઈ હતી અને ત્યારબાદ તેણે આ ફરિયાદ નોંધાવી છે.