રાજકોટમાં વધુ એક જીવલેણ અકસ્માતની ઘટના બની છે. મવડી વિસ્તાર પાસે આવેલી વગડ ચોકડી નજીક રાત્રિના ડમ્પરે પગપાળા જઇ રહેલા યુવાનને હડફેટે લેતા યુવકનું ઘટનાસ્થળે જ કમકમાટીભર્યું મોત થયું હતું. લક્ષ્મીનગર વિસ્તારમાં રહેતો યુવાન કેટરીંગ કામ માટે જતો હતો. દરમિયાન આ ઘટના બની હતી અકસ્માતના આ બનાવના પગલે તાલુકા પોલીસે જરૂરી કાર્યવાહી કરી હતી. અકસ્માતના આ બનાવની જાણવા મળતી વિગતો મુજબ મવડી વિસ્તારમાં આવેલી વગર ચોકડી પાસે રાત્રિના ડમ્પરે અહીં પગપાળા જઈ રહેલા જોની કાલસીંગ જાદવ(ઉ.વ 22) નામાના યુવાનને હડફેટ લીધો હતો. બનાવ અંગે કોઇએ 108 ને જાણ કરતા 108 ના ઇએમટીએ જોઈ તપાસી યુવાનને મૃત જાહેર કર્યો હતો.