૭ લાખ ‚પિયાના ૯.૫૦ લાખ ચુકવી દેવા છતા વધુ ૧૫ લાખની માંગણી પઠાણી ઉઘરાણી કરીને ધમકી દીધાની એક સામે ફરીયાદ

જામનગરનો એક રીક્ષા ચાલક યુવાન વ્યાજખોરની ચુંગાલમાં ફસાયો છે, અને વ્યાજખોરની રાક્ષસી વ્યાજ સાથેની પઠાણી ઉઘરાણીને લઈને આખરે ફીનાઇલ પી લેવાનો વારો આવ્યો છે. જોકે હાલ તેની તબિયત સુધારા પર હોવાથી રજા અપાઇ છે, જ્યારે પોલીસે વ્યાજખોર સામે ગુનો નોંધી તેની શોધ ખોળ હાથ ધરી છે.

જામનગરમાં નાગનાથ નાકા પાસે પઠાણફળીમાં રહેતા અને રીક્ષા ડ્રાઇવિંગ કરતા અક્રમ જાહિદભાઈ પઢિયાર (ઉ.વ.૩૨) નામના રીક્ષા ચાલક યુવાને તાજેતરમાં  મચ્છર મારવાની દવાનું પ્રવાહી પી લેતાં તેને સારવાર માટે જામનગરની જીજી હોસ્પિટલમાં દાખલ કરાયો હતો.

સૌપ્રથમ તેના પરિવારજનો દ્વારા વ્યાજખોરના ત્રાસના કારણે આ પગલું ભર્યું હોવાનું જાહેર કરાયું હતું. ત્યારબાદ અકરમ પઢીયાર ભાનમાં આવતાં દરબારગઢ પોલીસ ચોકીના સ્ટાફ દ્વારા હોસ્પીટલ ખાતે દોડી જઇને નિવેદન લેવાયુ હતું જેમાં વ્યાજખોરો બાબતે વાત જણાવી હતી.

પોતાને થોડા વર્ષ પહેલાં પૈસાની જરૂરિયાત હોવાથી આરોપી પાસેથી સાત લાખ રૂપિયા ૭ ટકાના વ્યાજે લીધા હતા, જેનું દર મહિને વ્યાજ સહિત કુલ સાડા ચાર લાખ રૂપિયાની રકમ બે વર્ષ દરમિયાન ચુકવી આપી હતી.

એટલું જ માત્ર નહીં અલગ અલગ દુકાનમાંથી કુલ પાંચ લાખ રૂપિયાનો કરિયાણાનો માલ સામાન પણ મેળવીને રીયાઝ કુરેશીને આપી દીધો હતો. આમ મળી કુલ ૯.૫૦ લાખ જેટલું ચૂકવણું કરી દીધું હોવા છતાં હજુ વધુ ૧૫ લાખ રૂપિયા આપવા પડશે, તેવી માંગણી કરીને ધમકી અપાતાં વ્યાજખોર ના ત્રાસના કારણે આત્મહત્યાનો પ્રયાસ કર્યો હોવાનું જણાવ્યું હતું.  જે ફરિયાદના અનુસંધાને પોલીસે નાગનાથના નાકે રહેતા આરોપી રિયાઝ  જુસબભાઇ કુરેશી સામે આઇપીસી કલમ ૫૦૪- અને ૫૦૬-૧ તેમજ મની લેંડર્સ એક્ટની કલમ ૫,૩૯ ૪૦, અને ૪૨ મુજબ ગુનો નોંધ્યો છે.