​​​​​​​થાઈલેન્ડમાં એક ખૂબ જ વિચિત્ર બાબત જોવા મળી છે. ફિલ્મનું સ્ક્રીનિંગ અહીં કબ્રસ્તાનમાં કરવામાં આવ્યું હતું. તે પણ અહીં દફનાવવામાં આવેલા 3000 મૃતદેહો માટે. દેશના નાખોન રત્ચાસિમા પ્રાંતમાં આ જોવા મળ્યું છે. આ કબ્રસ્તાનમાં ફિલ્મ જોવાના અનુભવને એક અલગ જ સ્તર પર લઈ જવામાં આવ્યો છે. પૂર્વોત્તર થાઈલેન્ડના આ કબ્રસ્તાનને ચીનના લગભગ 3000 વંશજોનું વિશ્રામ સ્થાન માનવામાં આવે છે.

અધિકારીઓએ ખુરશીઓ ગોઠવી અને વર્ષો પહેલા આ દુનિયા છોડી ગયેલા લોકોના આત્માઓને યાદ કરવાના પ્રયાસરૂપે એક ફિલ્મ બતાવી. કબ્રસ્તાનમાં કબરો મોટાભાગે થાઈલેન્ડમાં રહેવા આવેલા ચીની લોકોના વંશજોની છે. ફિલ્મનું સ્ક્રીનિંગ 2 થી 6 જૂન, 2024 દરમિયાન થયું હતું. ઓપન-એર ફિલ્મ શો દરમિયાન ફક્ત ચાર સ્ટાફ સભ્યો હાજર હતા અને દરરોજ સાંજે 7 વાગ્યાથી મધ્યરાત્રિ સુધી ફિલ્મો બતાવવામાં આવતી હતી.

સ્ટાફ દ્વારા સ્વાદિષ્ટ ભોજનનું પણ આયોજન કરવામાં આવ્યું હતું. અહીં આત્માઓને પેપર આપીને સન્માનિત કરાયા હતા. ખાણીપીણીની સાથે સાથે ઘર, વાહનો, કપડા અને રોજિંદી જરૂરિયાતની ચીજવસ્તુઓના મોડલ પણ હાજર હતા. સવાંગ મેટ્ટા થમ્માસાથન ફાઉન્ડેશન દ્વારા આ ઈવેન્ટનું આયોજન આત્માઓને ખુશ કરવા અને તેમને આધુનિક મનોરંજન પૂરું પાડવા માટે કરવામાં આવ્યું હતું.

ફાઉન્ડેશને કહ્યું કે શા માટે માત્ર જીવતા લોકો જ ફિલ્મોનો આનંદ  માણી શકે? ઈવેન્ટ ઓર્ગેનાઈઝરે કહ્યું કે તે શરૂઆતમાં કબ્રસ્તાનમાં ફિલ્મો બતાવવાના વિચારથી નર્વસ હતો. પછી જેમ જેમ પ્રોજેક્ટ પર કામ આગળ વધતું ગયું તેમ તેમ આશ્ચર્ય અને ભય દૂર થવા લાગ્યો. તેણે કહ્યું કે આ અનુભવ સંપૂર્ણપણે અલગ અને સકારાત્મક છે.