પોરબંદરની યુવતીએ વડોદરા ખાતે યોજાયેલા રંગોળી પ્રદર્શનમાં રતન ટાટાની અદ્ભુત રંગોળી બનાવી હતી.
પોરબંદરની યુવતી વિશ્ર્વા ડઢાણીયાએ વડોદરા ખાતે પરંપરા રંગોળી ગ્રુપ દ્વારા આયોજિત રંગોળી પ્રદર્શનમાં ભાગ લઈ રતન ટાટાની અદ્દભુત રંગોળી બનાવી પોરબંદરનું ગૌરવ વધાર્યું છે.
વિશ્ર્વાએ વડોદરાની એમ.એસ.યુનિવર્સિટીમાં ફાઇન આર્ટનો અભ્યાસ પુર્ણ કરેલ છે અને ત્યારબાદ ભારતભરના અનેક કલા પ્રદર્શનોમાં ભાગ લઈ પોતાની કલાનું કામણ પાથરેલ છે.વિશ્ર્વાને ચિત્રકામની સાથે સાથે રિયાલિસ્ટિક રંગોળી બનાવવાનો પણ ખુબ શોખ છે. 
વડોદરાના ખુબ જ પ્રખ્યાત પરંપરા રંગોળી ગ્રુપ દ્વારા છેલ્લા ૧૪ વર્ષથી દિવાળી નિમિત્તે અદ્દભુત રંગોળી પ્રદર્શન યોજવામાં આવે છે.આ પ્રદર્શનમાં પોરબંદરની યુવતી વિશ્વા ડઢાણીયાએ પણ ઉત્સાહપુર્વક ભાગ લઈ ૯૦ કલાકની સતત મહેનત બાદ ૬૦ કિલો કલરના ઉપયોગથી રતન ટાટાની રંગોળી બનાવી ભારત રત્ન એવા રતન ટાટાને ભાવપુર્ણ શ્રદ્ધાંજલિ અર્પણ કરી હતી. 
વડોદરા ખાતે યોજાયેલ આ રંગોળી પ્રદર્શનમાં બનાવેલી રંગોળીઓ ૩ નવેમ્બર સુધી લોકો જોઈ શકે તે માટે પ્રદર્શન ખુલ્લું મુકવામાં આવ્યું છે.વિશ્ર્વાની આ અનેરી સિદ્ધિ બદલ નવરંગ સાહિત્ય સંગીત કલા પ્રતિષ્ઠાનના પ્રમુખ લાખણશી ગોરાણિયાએ વિશ્ર્વાને અભિનંદન આપી તેમના ઉજ્જવળ ભવિષ્ય માટે શુભેચ્છાઓ પાઠવી હતી.