ખંભાળિયા તાલુકાના નાના આંબલા ગામે રહેતા આબેદાબેન ભીખુભાઈ સુલેમાનભાઈ ગજણ નામના ૩૧ વર્ષના પરિણીત મહિલાએ ગઈકાલે મંગળવારે સવારના સમયે પોતાના ઘરે કોઈ અકળ કારણોસર પંખા સાથે દુપટ્ટો બાંધીને ગળાફાંસો ખાઈ લેતા તેણીનું મૃત્યુ નીપજ્યું હતું.
મૃતક મહિલાનો લગ્ન ગાળો દસ વર્ષનો હતો. આ અંગેની જાણ મૃતકના માતા ખમીશાબેન દાઉદભાઈ સંઘાર (ઉ.વ. ૬૫) એ વાડીનાર મરીન પોલીસને કરી છે.
**
નપાણીયા ખીજડીયામાં શ્રમિક યુવાનનું લપસી જતાં ઈજાથી મૃત્યુ
કાલાવડ તાલુકાના નાપાણિયા ખીજડીયા ગામમાં રહેતા એક શ્રમિક યુવાનને પાણીની કુંડીમા ન્હાવા જતી વખતે સેવાળના કારણે પગ લપસી જતાં નીચે પટકાઈ પડવાથી માથામાં ઇજા થવાથી મૃત્યુ નીપજયું છે.
મૂળ ગોધરા જિલ્લાના મોરવા હળફ તાલુકાના ખુદરા ગામના વતની અને હાલ કાલાવડ તાલુકાના નપાણીયા ખીજડીયા ગામના ખેડૂત લાલાભાઇ આણંદભાઈ અકબરીની વાડીમાં રહીને ખેત મજૂરી કામ કરતા દલપતભાઈ ભોદુભાઈ માલીવાડ નામના ૨૩ વર્ષના શ્રમિક યુવાનને ગઈકાલે પોતાની વાડીમાં પાણીની કુંડીમાં નાહવા જતી વખતે અકસ્માત નડ્યો હતો.
પાણીની કુંડીમાં સેવાળ જામી ગયો હોવાથી તેનો પગ લપસી ગયો હતો, અને નીચે પડી જવાથી તેને માથાના ભાગે ગંભીર ઈજા થઈ હતી. તેથી તેને સારવાર માટે કાલાવડની સરકારી હોસ્પિટલમાં લઇ જવાયો હતો, ત્યાં ફરજ પરના તબીબે તેનું મૃત્યુ નીપજ્યું હોવાનું જાહેર કર્યું હતું.
આ બનાવ અંગે મૃતકના પિતા ભોદુભાઈ મેઘાભાઈ માલીવાડે પોલીસને જાણ કરતાં કાલાવડ ગ્રામ્ય પોલીસે મૃતદેહનો કબજો સંભાળી પોસ્ટ મોર્ટમ સહિતની કાર્યવાહી હાથ ધરી છે.