એક મહિના પહેલાં પત્નીનું બીમારીના કારણે મૃત્યુ થયા પછી સતત ચિંતામાં રહેલા વયોવૃદ્ધે પત્નીના વિયોગમાં પોતે પણ આપઘાત કર્યો

જામનગરમાં ગાંધીનગર નજીક મોમાઈ નગર શેરી નંબર-૧ માં રહેતા રણછોડભાઈ દેવજીભાઈ વઢવાણા નામના ૮૦ વર્ષના બુઝુર્ગે આજે સવારે પોતાના ઘેર રવેશની છતમાં લગાવેલા હિંડોળાના હુકમાં દુપટ્ટો બાંધી ગળાફાંસા દ્વારા આત્મહત્યાનો પ્રયાસ કર્યો હતો.

જેથી ૧૦૮ ની ટુકડીને સ્થળ પર બોલાવતાં તેઓએ રણછોડભાઈ નું મૃત્યુ નીપજયું હોવાનું જાહેર કર્યું હતું. આ બનાવ અંગે મૃતકના પુત્ર કિરણભાઈ રણછોડભાઈ વઢવાણાએ પોલીસને જાણ કરતાં સીટી બી. ડિવિઝન પોલીસે મૃતદેહનો કબ્જો સંભાળી વધુ તપાસ હાથ ધરી છે. પોલીસ પૂછપરછમાં મૃતક રણછોડ ભાઈના પત્ની સરલાબેન કે જેઓનું આજથી એક માસ પહેલાં બીમારીના કારણે અવસાન થયું હતું, તેથી તેઓ સતત ચિંતામાં રહેતા હતા, અને તેમણે આ પગલું ભરી લીધાનું જાહેર કરાયું છે.