જામનગર શહેર, જીલ્લામાં જુગાર અંગે વ્યાપક દરોડા પાડવામાં આવી રહયા છે, ગઇકાલે વધુ ત્રણ સ્થળે પોલીસે ત્રાટકીને ૬ મહિલા સહિત ૧૬ને રોકડ સાથે અટકાયત કરી હતી, અહીંના પાણાખાણ, જામજોધપુર અને સંગચિરોડામાં દરોડા પાડવામાં આવ્યા હતા.


જામનગરના ગરીબનગર પાણાખાણ વિસ્તારમાં તિનપતીનો જુગાર રમતી મુરલીધર સોસાયટીમાં રહેતી સવિતાબેન માલદે નંદાણીયા, ગાયત્રીનગરની મુમતાઝબેન સીદીક ખફી, દિ.પ્લોટ-૫૮માં રહેતી મનિષા ઉર્ફે પ્રવિણાબેન પ્રતાપ હરવરા, તિરુપતી સોસાયટીની સોનલબેન વિજય શ્રીમાળી, સરદારનગરની જયદીપાબેન વિજય ગોસ્વામી અને દિ.પ્લોટ હાલ હર્ષદમીલની ચાલી, પ્રણામી સોસાયટીમાં રહેતી જમનાબેન હંસરાજ ખીચડીયાને રોકડા ૧૫૧૦૦ અને ગંજીપતા સાથે અટકાયત સીટી-બી ડીવીઝને કરી હતી.


બીજા દરોડામાં જામજોધપુરમાં સ્ટ્રીટલાઇટના અંજવાળે તિનપતીનો જુગાર રમતા જામજોધપુરના દેવજી ઉર્ફે દેવો ગોવિંદ રાઠોડ, ચંદુ પાલા રાઠોડ, જેન્તી ઉર્ફે દકુ મનુ મકવાણા, અમુ બધા પરમાર અને મનસુખ પાલા વિંજુડાને રોકડા ૩૩૪૦ સાથે ઝડપી લીધા હતા.
ત્રીજા દરોડામાં શેઠવડાળાના સંગચિરોડા બસ સ્ટેન્ડ પાસે જાહેરમાં તિનપતીનો જુગાર રમતા સંગચિરોડા ગામના ભુપતગીરી પ્રેમગીરી ગોસ્વામી, દિનેશ મંગા સોલંકી, જીવરાજ કરશન સોલંકી, મહોબતસિંહ અમરસિંહ ચાવડા અને રાણાવાવના મફતીયાપરાના હારૂન મામદ વિરપરીયાને સ્થાનીક પોલીસે પકડી લીધા હતા, દરોડા દરમ્યાન ૧૫૬૦ની રોકડ અને ગંજીપતા કબ્જે લેવાયા હતા.