રાજકોટમાં 3000થી વધારે દબાણો સરકારી જમીન પર ખડકી અને કરોડોની જમીન પર ભુમાફીયાઓએ કબજો જમાવી લીધો છે. તેની સામે રાજકોટ જિલ્લા વહીવટી તંત્ર દ્વારા કાર્યવાહી શરૂ કરવામાં આવી છે. આજે સ્માર્ટ સિટીમાં દબાણયુકત રૂ.80 કરોડની સરકારી જમીન પર કાચા પાકા બાંધકામ તોડી પાડયા હતા અને જમીન સરકાર હસ્તક લીધી હતી.

બેથી ત્રણ વખત નોટિસ ફટકારી હતી
રાજકોટના રૈયા ગામ નજીક આવેલ સ્માર્ટ સિટી નજીક છેલ્લા કેટલાય સમયથી સરકારી જમીન પર બિનઅધિકૃત દબાણો કરવામાં આવ્યા હતા. પશ્ચિમ મામલતદારને દબાણો ધ્યાનમાં આવતા બેથી ત્રણ જેટલી નોટિસો ફટકાર્યા છતાં પણ દબાણો દૂર ન કરતા આજે પશ્ચિમ મામલતદાર અજીત જોષીની ટીમ દ્વારા સર્વે નંબર 318 આશરે 16000 ચોરસ મીટર જમીન પરના દબાણો દૂર કરવાની કામગીરી હાથ ધરવામાં આવી હતી અને કરોડો રૂપિયાની સરકારી જમીન ખુલ્લી કરવામાં આવી હતી.