જાપાનમાં એમ્પિલ વાવાઝોડાની અસર દેખાવા લાગી છે. આ વાવાઝોડું જાપાનના મુખ્ય ટાપુ તરફ ઝડપથી આગળ વધી રહ્યું છે. વાવાઝોડાને કારણે એર ટ્રાફિકને અસર થઈ છે. તોફાનના કારણે સરકારે ભૂસ્ખલન અને પૂરની ચેતવણી પણ જાહેર કરી છે. હવામાન વિભાગે લોકોને ઘરની અંદર રહેવા અને જોખમોથી સાવચેત રહેવાની સલાહ આપી છે. કંપનીઓએ કર્મચારીઓને વહેલા ઘરે પરત ફરવા આગ્રહ કર્યો છે.

વાવાઝોડાના કારણે જાપાનમાં સેંકડો ફ્લાઈટ્સ રોકી દેવામાં આવી છે અને લગભગ 10,000 ઘરોને ખાલી કરવાની સલાહ આપવામાં આવી છે. ટાયફૂન એમ્પિલને "ખૂબ જ મજબૂત" શ્રેણીમાં રાખવામાં આવ્યું છે. વાવાઝોડું ટોક્યો નજીક પહોંચી ગયું છે. વાવાઝોડાને કારણે 216 કિલોમીટર પ્રતિ કલાક (134 માઈલ પ્રતિ કલાક)ની ઝડપે પવન ફૂંકાઈ રહ્યો છે. આ દરમિયાન અનેક વિસ્તારોમાં વીજળી પણ ખોરવાઈ ગઈ છે. લગભગ 120,000 મુસાફરોને અસર કરતા 600થી વધુ સ્થાનિક અને આંતરરાષ્ટ્રીય ફ્લાઇટ્સ રદ કરવામાં આવી છે. તોફાનના કારણે ટોક્યો અને નાગોયા વચ્ચેની હાઇ-સ્પીડ શિંકાનસેન ટ્રેન સેવાઓ પણ અટકાવી દેવામાં આવી છે.

જાપાનમાં ભૂકંપ

જણાવી દઈએ કે તાજેતરમાં જ જાપાનમાં ભૂકંપના જોરદાર આંચકા અનુભવાયા હતા. ભૂકંપની તીવ્રતા રિક્ટર સ્કેલ પર 6.9 માપવામાં આવી હતી. ભૂકંપના કારણે સુનામીની ચેતવણી પણ જાહેર કરવામાં આવી હતી. દક્ષિણ જાપાનમાં આંચકા અનુભવાયા હતા. ભૂકંપના કારણે જાપાનના દરિયાકાંઠાના વિસ્તારો મિયાઝાકી, કોચી, ઈહિમે, કાગોશિમા અને આઈતામાં પણ સુનામીની ચેતવણી જાહેર કરવામાં આવી હતી.