રાજકોટના કાલાવડ રોડ પર સ્થિત TRP ગેમ ઝોનમાં શનિવારે સાંજે 4.30 કલાકે આગ ફાટી નીકળી હતી. ગતસાંજે 4.30 વાગ્યે ગુજરાતના રાજકોટમાં TRP ગેમ ઝોનમાં લાગેલી આગમાં 32 લોકોના મોત થયા છે. મૃતકોમાં 12 બાળકો પણ સામેલ છે. ફાયર બ્રિગેડની 8 ટીમોએ લગભગ 3 કલાકની જહેમત બાદ આગને કાબુમાં લીધી હતી. 25થી વધુ લોકોને બચાવી લેવાયા છે. રાહત કાર્ય આખી રાત ચાલુ રહ્યું. મૃત્યુઆંક વધવાની આશંકા છે.

જો કે, આ વચ્ચે એક ચોંકાવનારી બાબત સામે આવી છે. ગેમ ઝોનના સંચાલકોની ઓફિસ માંથી દારૂની બોટલ મળી આવી છે. હાલમાં પોલીસે આ તમામ બીયરની બોટલ કબ્જે કરી છે, પ્રત્યક્ષદર્શીના જણાવ્યા મુજબ, કાલાવડ રોડ પર આવેલા આ ગેમ ઝોનમાં વીકેન્ડ હોવાથી 99 રૂપિયામાં 500 રૂપિયાની ટિકિટ આપવામાં આવી રહી હતી, તેથી ભીડ વધુ હતી. અકસ્માત બાદ હાલમાં 6 લોકો વિરુદ્ધ ફરિયાદ નોંધાઈ છે.

ત્રણ માળનો ગેમ ઝોન 2020માં ભાડાની 2 એકર જમીન પર બનાવવામાં આવ્યો હતો. તેનું માળખું લાકડાના અને ટીન શેડ પર ઊભું હતું. ઘણી જગ્યાએ રિપેરિંગ અને રિનોવેશનનું કામ પણ ચાલી રહ્યું હતું. એક જગ્યાએ, દાદર પર વેલ્ડિંગના સ્પાર્કને કારણે વિસ્ફોટ થયો અને નજીકમાં આગ ફાટી નીકળી.

ગેમ ઝોનનો ડોમ કાપડ અને ફાઈબરનો બનેલો હતો. સ્ટ્રક્ચર લાકડા, ટીન અને થર્મોકોલ શીટ્સથી બનેલું હતું. ફ્લોર પણ રબર, રેઝિન અને થર્મોકોલથી ઢંકાયેલું હતું. આ ઉપરાંત 2 હજાર લિટર ડીઝલ અને 1500 લિટર પેટ્રોલનો પણ સંગ્રહ કરવામાં આવ્યો હતો. આથી થોડીવારમાં આગ ઝડપથી ફેલાઈ ગઈ હતી. આગ થોડીવારમાં નીચેથી ઉપર સુધી ફેલાઈ ગઈ હતી. ત્રણ માળના માળખામાં નીચેથી ઉપર જવા માટે માત્ર એક જ સીડી હતી. બીજા અને ત્રીજા માળે રહેતા લોકોને બચવાની તક મળી ન હતી.