ખૂબ ઝડપથી વિકસીત થઇ રહેલાં જામનગર-ખંભાળીયા રોડ પર જમીનોની કિંમત આસમાને પહોંચી રહી છે ત્યારે લાખાબાવળના ચોક્કસ સર્વે નંબરમાં ફુલ-ઝાડ અને નાળિયેરીના વાવેતરના હેતુ માટે સરકાર દ્વારા અપાયેલી જમીનને હેતુ ફેર કરાવીને મોટું કૌભાંડ આચરવામાં આવ્યું હોવાની કથિત વિગતો પ્રકાશિત થયા બાદ આજે જામનગરના જિલ્લા કલેક્ટર બી.એ. શાહ સાથે આજકાલ દ્વારા વાતચીત કરવામાં આવતાં એમણે કહ્યું હતું કે, આ જમીન સંબંધેની ફાઇલોનો સૌપ્રથમ અભ્યાસ કરવામાં આવશે અને જરુર જણાયે આગળની કાર્યવાહી કરવામાં આવશે.

અત્રે નોંધનીય છે કે, લાખાબાવળમાં કરોડોની જમીન પર ખેલ પાડવામાં આવ્યો હોવાની જે વિગતો ચર્ચાઇ રહી છે તેમાં, રાજકીય ઓથ ધરાવતાં નાનું કદ પણ મોટું નામવાળા એક બિલ્ડર અને તેની સાથે કેટલાંક મોટા માથા પ્રકરણમાં સામેલ હોવાનું કહેવાય રહ્યું છે, આ પ્રકરણ સંબંધે જિલ્લા કલેક્ટર તપાસ કર્યા બાદ શું પગલાં લે છે...? તેના પર સૌની મીટ મંડાઇ રહી છે.

જિલ્લા કલેક્ટરે વધુમાં કહ્યું હતું કે, આ સમગ્ર પ્રકરણમાં હકીકત શું છે...? તે અંગે અભ્યાસ કરવામાં આવી રહ્યો છે, આ પ્રકરણમાં મ્યુ. કમિશ્નરની કોઇ ભૂમિકા હોતી નથી, કારણ કે તેમના કાર્યક્ષેત્રમાં આવતું નથી, ત્યારે હાલ તો સમગ્ર પ્રકરણ અંગે તમામ પાસાની તપાસ કરવામાં આવી રહી છે.

જાણવા મળતી માહિતી મુજબ લાખાબાવળમાં આવેલા કેટલાંક સર્વે નંબરની જુની નોંધમાં, નાળીયેરી વાવેતર હેતુ માટેની જમીન આપવામાં આવી હોવાનું ખૂલ્યું છે, જેને હેતુફેર કરાવીને એક જાણીતા બિલ્ડરે બીનખેતી કરાવી લીધાના આક્ષેપ પણ થઇ રહ્યા છે, ફુલઝાડના હેતુ માટેની જમીન બીનખેતી થઇ અને તેનું વેંચાણ પણ થઇ રહ્યું હોવાની વિગતો ધીરે ધીરે ખુલી રહી છે, જો કે, આ સમગ્ર પ્રકરણમાં હાલ તો બીજું કોઇ બોલવા-કહેવા તૈયાર નથી.

લાખાબાવળના આ જમીન પ્રકરણ અંગે હાલ તો ધીરે-ધીરે તપાસ થઇ રહી છે, આગામી દિવસોમાં તેના કેવા પડઘાં પડશે...? તેના પર બધાંની નજર છે, પરંતુ કલેક્ટરના જણાવ્યા મુજબ આ જમીન પ્રકરણ કલેક્ટરના કાર્યક્ષેત્રમાં આવે છે અને તેમાં મ્યુ. કમિશ્નરને કોઇપણ જાતના લેવા-દેવા નથી, આમ લાખાબાવળ જમીન પ્રકરણે જિલ્લાભરમાં ભારે ચર્ચા જગાવી છે.