રાજકોટ, અમદાવાદ, જામનગર, વડોદરા, સુરત, જુનાગઢ, ભાવનગરમાં સ્પર્ધાત્મક પરીક્ષાની તૈયારી કરાવતા 40 કોચિંગ કલાસિસ પર સ્ટેટ જીએસટીના દરોડા પડ્યા છે. સંચાલકો વિદ્યાર્થીઓની ઓછી સંખ્યા દર્શાવી કરચોરી કરતા હોય તપાસ હાથ ધરી છે. 

રાજયવ્યાપી દરોડા પાડી કરચોરી અંગે તપાસનો ધમધમાટ હાથ ધર્યો હોવાનું જીએસટી વિભાગના સૂત્રોમાંથી જાણવા મળ્યું છે. ઉલ્લેખનિય છે કે, આવા કોચિંગ ક્લાસ ઉપર 18 ટકા જીએસટી લાગુ છે. ત્યારે ક્લાસિસ સંચાલકો તેનાં કલાસિસમાં વિદ્યાર્થીઓની ખોટી એટલે કે ઓછી સંખ્યા દર્શાવી કરચોરી કરતા હોય છે અને આવી ફરિયાદો હાલમાં જ જીએસટી વિભાગને મળતા વિજિલન્સ વિંગે રાજકોટ સહિત રાજ્યમાં 40થી વધુ કોચિંગ ક્લાસિસનાં સંચાલકો ઉપર દરોડા પાડ્યા છે.

રાજકોટમાં કાલાવડ રોડ ઉપર આવેલ આઈસીઈ તથા આકાશવાણી ચોકમાં ચિરાગભાઈ નામની વ્યકિત દ્વારા ચલાવતા કલાસિસ ઉપર સ્ટેટ જીએસટી વિભાગે દરોડા પાડ્યા છે. જ્યારે અમદાવાદ, વડોદરા, સુરત, જુનાગઢ, ભાવનગર, જામનગર સહિતનાં સ્થળોએ આવેલા જુદા જુદા કોચિંગ ક્લાસિસ ઉપર દરોડાની કાર્યવાહી હાથ ધરાઈ છે અને કરચોરી અંગે તપાસની કાર્યવાહી ચાલુ છે.