યૂરોપમાં પેરટ ફીવરથી થતા મોતથી ભય ફેલાયો છે. અત્યાર સુધીમાં આના કારણે ૫ લોકોના મોત થયા છે, પરંતુ તેના વધતા જતા કેસોએ તણાવમાં વધારો કર્યો છે.વર્લ્ડ હેલ્થ ઓર્ગેનાઈઝેશને પણ તેની પુષ્ટિ કરી છે. આ તાવને સિટાકોસિસ પણ કહેવામાં આવે છે, જેણે યુરોપિયન દેશોના લોકોને ખરાબ રીતે અસર કરી છે. અહીં તે ૨૦૨૩ માં શરૂ થયું હતું. આ ચેપ ઘણા લોકોમાં ફેલાયો છે અને અત્યાર સુધીમાં આ રોગને કારણે ૫ લોકોના મોત થયા છે.

સીએનએનના રિપોર્ટ અનુસાર, ગયા વર્ષે જર્મનીમાં ૧૪ અને ઓસ્ટ્રિયામાં ૧૪ કેસ નોંધાયા હતા. આ વર્ષે માર્ચમાં ઓસ્ટ્રિયામાં ૪ કેસ નોંધાયા હતા. ડેનમાર્કમાં આ વર્ષે ફેબ્રુઆરી સુધીમાં ૨૩ કેસની પુષ્ટિ થઈ હતી. નેધરલેન્ડમાં પણ ૨૧ કેસ નોંધાયા છે. 

પેરટ ફીવર એ બેક્ટેરિયલ ચેપ છે જે ક્લેમીડિયા પરિવારના બેક્ટેરિયાના ચેપ દ્વારા ફેલાય છે. આ બેક્ટેરિયા પોપટ સહિત ઘણા પક્ષીઓને ચેપ લગાડે છે અને પક્ષીઓ દ્વારા માણસોને ચેપ લગાડે છે. ખાસ વાત એ છે કે ચેપગ્રસ્ત પક્ષીમાં રોગની અસર દેખાતી નથી. અમેરિકાની આરોગ્ય એજન્સી સેન્ટર્સ ફોર ડિસીઝ કંટ્રોલ એન્ડ પ્રિવેન્શન અનુસાર, જ્યારે કોઈ વ્યક્તિ ચેપગ્રસ્ત પક્ષી અથવા તેના મળના સંપર્કમાં આવે છે ત્યારે ચેપ ફેલાય છે. ચેપગ્રસ્ત પક્ષીઓ જ્યાંથી શ્વાસ બહાર કાઢે છે ત્યાં માણસો હાજર હોય તો પણ ચેપ ફેલાઈ શકે છે. જો કે, આ રોગ ચેપગ્રસ્ત પક્ષીને ખાવાથી ફેલાતો નથી.

એજન્સી કહે છે કે આ રોગ એક વ્યક્તિથી બીજામાં ફેલાવો શક્ય છે, પરંતુ અભ્યાસ દર્શાવે છે કે કેસ દુર્લભ છે. વર્લ્ડ હેલ્થ ઓર્ગેનાઈઝેશનનું કહેવું છે કે તેના મોટાભાગના કેસ ઘરમાં રાખવામાં ૫આવેલા સંક્રમિત પક્ષીઓના છે.

આ એક ઝૂનોટિક રોગ છે, એટલે કે તે સૌપ્રથમ પક્ષીઓમાં ફેલાય છે અને મનુષ્યોને પણ ચેપ લગાવી શકે છે. નિષ્ણાતો કહે છે કે, આ રોગ પક્ષીઓના પીંછાથી પણ ફેલાય છે. તેથી સતર્ક રહેવાની જરૂર છે. જે લોકો પક્ષીઓના વ્યવસાય સાથે સંકળાયેલા છે અને તેમને પાળે છે તેઓને આ રોગનું સૌથી વધુ જોખમ રહેલું છે. આ સિવાય પોલ્ટ્રી વર્કર્સ, એનિમલ એક્સપર્ટ અને માળીઓ પણ વધુ જોખમમાં છે.