રશિયા અને યુક્રેન વચ્ચે એક વર્ષથી વધુ સમયથી યુદ્ધ ચાલી રહ્યું છે. બંનેમાંથી કોઈ દેશ ઝૂકવા તૈયાર નથી. દરમિયાન, ઇન્ટરનેશનલ ક્રિમિનલ કોર્ટે યુક્રેનમાં યુદ્ધ અપરાધો માટે રશિયન રાષ્ટ્રપતિ પુતિન માટે ધરપકડ વોરંટ જારી કર્યું છે. કોર્ટ કહે છે કે રશિયન રાષ્ટ્રપતિ યુક્રેનના કબજા હેઠળના પ્રદેશોમાંથી રશિયન ફેડરેશનમાં લોકો (ખાસ કરીને બાળકો)ના ગેરકાયદેસર સ્થાનાંતરણના યુદ્ધ અપરાધ માટે કથિત રીતે જવાબદાર છે.

રશિયાએ તેના પાડોશી યુક્રેન દ્વારા કરવામાં આવેલા આવા અત્યાચારના આરોપોને વારંવાર ફગાવી દીધા છે. ઇન્ટરનેશનલ ક્રિમિનલ કોર્ટના પ્રી-ટ્રાયલ ચેમ્બર-2એ પુતિન સહિત બે વ્યક્તિઓ માટે ધરપકડ વોરંટ જારી કર્યું છે. તેમાંથી બીજું નામ મારિયા અલેકસેવેના લ્વોવા-બેલોવાનું છે.

કોર્ટે નોંધ્યું હતું કે 24 ફેબ્રુઆરી, 2022 ના રોજ રશિયાના આક્રમણની શરૂઆતથી યુક્રેનના કબજા હેઠળના પ્રદેશમાં કથિત રીતે ગુનાઓ આચરવામાં આવ્યા હતા. 

ઇન્ટરનેશનલ ક્રિમિનલ કોર્ટે કહ્યું કે રશિયન રાષ્ટ્રપતિના કાર્યાલયમાં બાળકોના અધિકારોના કમિશનર મારિયા અલેકસેવેના લ્વોવા-બેલોવા કથિત રીતે બાળકોના ગેરકાયદેસર દેશનિકાલ અને વ્યક્તિઓના ગેરકાયદેસર સ્થાનાંતરણના યુદ્ધ અપરાધ માટે જવાબદાર છે. ઉલ્લેખનીય છે કે ગત વર્ષે ફેબ્રુઆરીથી યુક્રેન અને રશિયા વચ્ચે યુદ્ધ ચાલી રહ્યું છે. યુક્રેન વારંવાર રશિયા પર યુદ્ધ અપરાધોનો આરોપ લગાવી રહ્યું છે.

આ દરમિયાન ચીનના રાષ્ટ્રપતિ શી જિનપિંગ સોમવારથી રશિયાની મુલાકાતે જઈ રહ્યા છે. આ દરમિયાન તેઓ વ્લાદિમીર પુતિન સાથે મહત્વપૂર્ણ વાતચીત કરશે અને યુક્રેનમાં યુદ્ધ સમાપ્ત કરવા માટે શાંતિ મંત્રણાની વકાલત કરી શકે છે.