રાજકોટ રેલવે ડિવિઝને સ્થાપ્યો નવો કીર્તિમાન: પાર્સલ આવકમાં પ્રથમ વખત ₹15 કરોડનો ઐતિહાસિક આંકડો પાર 

નાણાકીય વર્ષ 2025–26માં 43.10% નો રેકોર્ડ વધારો • ડિજિટલ પેમેન્ટ 95% થી વધુ 

પશ્ચિમ રેલવેના રાજકોટ ડિવિઝને નાણાકીય વર્ષ 2025-26માં પાર્સલ આવકના ક્ષેત્રમાં પ્રથમ વખત ₹15 કરોડનો આંકડો વટાવીને એક નવો ઈતિહાસ રચ્યો છે. રાજકોટ ડિવિઝનના સીનિયર ડિવિઝનલ કોમર્શિયલ મેનેજર સુનીલ કુમાર મીનાના જણાવ્યા અનુસાર, ડિવિઝને આ સમયગાળા દરમિયાન ₹15.05 કરોડની પાર્સલ આવક મેળવી છે, જે પાછલા નાણાકીય વર્ષ 2024-25ના ₹10.54 કરોડની સરખામણીએ 43.10% નો નોંધપાત્ર વધારો દર્શાવે છે.

રાજકોટ ડિવિઝન દ્વારા ઉપલબ્ધ સંસાધનોનો શ્રેષ્ઠ ઉપયોગ સુનિશ્ચિત કરીને 42 અસ્કયામતો (Assets) નો પૂર્ણ ઉપયોગ કરવામાં આવ્યો હતો, જેનાથી કાર્યક્ષમતામાં ધરખમ વધારો નોંધાયો છે.

સંસાધનોનો અસરકારક ઉપયોગ : 

આ સિદ્ધિમાં પ્રથમ વખત 24 ટનની ક્ષમતા ધરાવતી 34 પાર્સલ વેન (VP) જોડીને તેનું અસરકારક સંચાલન કરવામાં આવ્યું હતું, જેનો મોટો ફાળો રહ્યો છે. આ માધ્યમથી 765.16 ટન વધારાના માલનું લોડિંગ કરવામાં આવ્યું, જેનાથી ₹66.09 લાખની વધારાની આવક થઈ. આ સાથે ડિવિઝને ટ્રાફિકના નવા સ્ત્રોતોનો પણ સફળતાપૂર્વક વિસ્તાર કર્યો છે.

રાજકોટ ડિવિઝને ઇતિહાસમાં પ્રથમ વખત ₹15 કરોડની પાર્સલ આવકનો માઇલસ્ટોન પાર કરીને નવો બેન્ચમાર્ક સ્થાપિત કર્યો છે, જે ડિવિઝનની શ્રેષ્ઠ કાર્યક્ષમતાનું પ્રમાણ છે.

વિવિધ ચીજવસ્તુઓનું પરિવહન: 

માલસામાન પરિવહનના ક્ષેત્રમાં ડિવિઝને વિવિધ પ્રકારની વસ્તુઓનું સફળતાપૂર્વક પરિવહન કર્યું છે, જેમાં મુખ્યત્વે સમાવેશ થાય છે: ઇમિટેશન જ્વેલરી, ઘરવખરીનો સામાન અને બ્રાસ પાર્ટ્સ (પિત્તળના ભાગો),  ઓટોમોબાઈલ પાર્ટ્સ, કાપડ (ટેક્સટાઇલ), શાકભાજી અને ફળો, જલ્દી બગડી જાય તેવી વસ્તુઓ (Perishable Items) અને અન્ય વિવિધ ચીજવસ્તુઓ.

નાણાકીય વર્ષ 2025-26માં કુલ 4,55,555.05 ક્વિન્ટલ માલનું લોડિંગ કરવામાં આવ્યું હતું, જે ગયા વર્ષે 3,59,288.01 ક્વિન્ટલ હતું.

ડિજિટલ ક્રાંતિ અને પારદર્શિતા: 

આધુનિકીકરણ તરફ ડગ માંડતા ડિવિઝને પાર્સલ સેવાઓને સંપૂર્ણપણે ડિજિટલ અને પારદર્શક બનાવી છે:

કેશલેસ ટ્રાન્ઝેક્શન: પાર્સલ પેમેન્ટનો 95% થી વધુ હિસ્સો હવે ડિજિટલ માધ્યમથી મેળવવામાં આવે છે.

100% કોમ્પ્યુટરાઈઝ્ડ સિસ્ટમ: સમગ્ર ડિવિઝનમાં કોમ્પ્યુટરાઈઝ્ડ પાર્સલ સિસ્ટમ લાગુ કરવામાં આવી છે.

લાઈવ ટ્રેકિંગ: હવે ગ્રાહકોને પાર્સલનું લાઈવ ટ્રેકિંગ અને સમયસર રસીદના મેસેજ (SMS) મળે છે, જેનાથી ડિલિવરી ઝડપી અને સુરક્ષિત બની છે.
​​​​​​​

રાજકોટ ડિવિઝનલ રેલવે મેનેજર ગિરિરાજ કુમાર મીનાએ આ નોંધપાત્ર સિદ્ધિ બદલ આનંદ વ્યક્ત કરતા જણાવ્યું હતું કે, આ સફળતા ડિવિઝનની ઉત્કૃષ્ટ કાર્યક્ષમતા, ટીમવર્ક અને ગ્રાહક-કેન્દ્રી સેવાઓનું પરિણામ છે. રાજકોટ ડિવિઝન ભવિષ્યમાં પણ આવી જ રીતે નવી ઊંચાઈઓ સર કરીને ભારતીય રેલવેમાં પોતાની વિશિષ્ટ ઓળખને વધુ મજબૂત બનાવશે.