આજરોજ રાજકોટમાં એક ચોકાવનારી ઘટના સામે આવી છે. ઘરે રમતા રમતા જ એક બાળકને આકસ્મિક રીતે મૃત્યુ થયું છે. પ્રાપ્ત વિગતો મુજબ, શહેરના નરસિહનગરમાં પરિવાર સાથે રહેતા ધોરણ 5ના વિદ્યાર્થીને ગળામાં આંટી આવી જતા બાળકનું મૃત્યુ થયું છે.


ઘટનાની પ્રાથમિક માહિતી મુજબ, શહેરના આરટીઓ કચેરી નજીક નરસિહનગરમાં રહી સિક્યુરીટી ગાર્ડની નોકરી કરતા હરજીવનભાઈ દાફડાનો પુત્ર હર્ષ દાફડા આજરોજ બપોરના સમયે તેના અન્ય ભાઈ-બહેનો સાથે ઘરના બીજા માળે દુપટ્ટાનો હિચકો બાંધી રમતા હતા. આ પછી ત્રણેક વાગ્યા આસપાસ અન્ય ભાઈ બહેન નીચે આવી ગયા હોઈ 11 વર્ષીય હર્ષ એકલો જ ઉપર રમતો હતો.

થોડી વાર બાદ હરજીવનભાઈનો મોટો દીકરોફરી ઉપર ગયો હતો પણ તેને પોતાના નાનો ભાઈ બેહોશ પડેલો મળ્યો હતો. બાળકોએ જે દુપટ્ટાનો હિચકો બનાવ્યો હતો તે જ દુપટ્ટાથી ગળામાં આંટી વળી ગઈ હતી. આ બાદ પરિવારજનો અને પડોશીઓ હર્ષને સિવિલ હોસ્પિટલ ખાતે લઇ ગયા હતા, પણ તેને સારવાર મળે તે પહેલા જ તેનું મૃત્યુ નીપજ્યું હતું.


બનાવ અંગે સિવિલ હોસ્પિટલ દ્વારા બી ડિવિઝન પોલીસને જાણ કરતા પોલીસ મથકનો સ્ટાફ તાત્કાલિક સિવિલ હોસ્પિટલ ખાતે દોડી ગયો હતો.