રાજકોટમાં હોસ્પિટલ ચોક બાબા સાહેબ આંબેડકરના પૂતળાં ખાતે મોટી સંખ્યામાં વાલ્મીકિ સમાજના લોકોએ વિરોધ નોંધાવ્યો હતો. મહિલાઓ સહિત વાલ્મીકિ સમાજના લોકોએ થાળી વગાડી વિરોધ વ્યક્ત કર્યો હતો. હોસ્પિટલ ચોકથી કોર્પોરેશન સુધી થાળી વગાડતા વગાડતા રેલી કાઢી વિરોધ વ્યક્ત કર્યો હતો. મોટી સંખ્યામાં પોલીસ કાફલો ખડકાયો હતો. કોન્ટ્રાક્ટ પ્રથા નાબૂદ કરી સફાઈ કામદારોની કાયમી ભરતીની માગ સાથે વિરોધ કરવામાં આવ્યો છે. 26-26 વર્ષથી સરકાર લોલીપોપ આપતી હોવાનો વાલ્મીકિ સમાજના લોકોનો આક્ષેપ કરવામાં આવ્યો છે. કોન્ટ્રાક્ટ પ્રથામાં માત્ર 3 થી 5 હજાર પગાર મળે છે. અન્ય રકમ વચેટિયાઓ ખાઈ જાય છે. 5 હજાર કરોડનો ભ્રષ્ટાચાર કોન્ટ્રાક્ટ પ્રથામાં થાય છે. સરકાર દ્વારા માગ નહિ સ્વીકારવામાં આવે તો આવનારા સમયમાં આંદોલન વધુ ઉગ્ર બનાવવાની ચીમકી ઉચ્ચારવામાં આવી છે.