અરજીકર્તાએ પીએમ નરેન્દ્ર મોદીના હાથે અભિષેક પર પ્રતિબંધ લગાવવાની કરી માંગ  

સનાતન પરંપરાની વિરુદ્ધ બતાવી આ સમારોહને ગણાવ્યો ચુંટણી માટેનો સ્ટંટ 

અયોધ્યામાં ૨૨ જાન્યુઆરીએ યોજાનાર રામ લલ્લાના અભિષેક પર પ્રતિબંધ મૂકવા માટે અલ્હાબાદ હાઈકોર્ટમાં પીઆઇએલ દાખલ કરવામાં આવી છે. અરજીમાં અયોધ્યામાં રામ મંદિરમાં પ્રાણ પ્રતિષ્ઠા કાર્યક્રમ પર પ્રતિબંધ મૂકવાની માંગ કરવામાં આવી છે. અરજીકર્તાએ પીએમ નરેન્દ્ર મોદીના હાથે પ્રાણપ્રતિષ્ઠા પર પ્રતિબંધ મૂકવાની માંગ કરી છે. તેમજ શંકરાચાર્યના વાંધાઓને ટાંકીને તેને સનાતન પરંપરાની વિરુદ્ધ ગણાવ્યું છે.
​​​​​​​

ગાઝિયાબાદના ભોલા દાસ દ્વારા દાખલ કરવામાં આવેલી અરજીમાં આરોપ છે કે ભાજપ ૨૦૨૪ની લોકસભા ચૂંટણીનો ફાયદો ઉઠાવવા માટે આ કાર્યક્રમનું આયોજન કરી રહી છે. અરજીમાં કહેવામાં આવ્યું છે કે શંકરાચાર્યને પ્રાણ પ્રતિષ્ઠા કાર્યક્રમ સામે વાંધો છે. આ સિવાય મંદિર હજુ અધૂરું છે અને અધૂરા મંદિરમાં કોઈ દેવી-દેવતાનો અભિષેક કરી શકાતો નથી.

અરજીમાં એવું પણ કહેવામાં આવ્યું છે કે આ સિવાય પીએમ નરેન્દ્ર મોદી અને સીએમ યોગીની આ પ્રાણ પ્રતિષ્ઠા કાર્યક્રમમાં ભાગ લેવો એ બંધારણની વિરુદ્ધ છે. અરજીમાં કાર્યક્રમને માત્ર ચૂંટણી માટેનો સ્ટંટ ગણાવ્યો છે. આ જાહેર હિતની અરજી મંગળવારે દાખલ કરવામાં આવી છે. અરજીકર્તાના વકીલ અરવિંદ કુમાર બિંદે જણાવ્યું કે હાઈકોર્ટ આ અરજી સ્વીકારે અને બને તેટલી વહેલી તકે તેની સુનાવણી કરે તે માટેના પ્રયાસો કરવામાં આવશે.