રિયાલીટી શો બિગ બોસ તેની દરેક સિઝન વખતે ખૂબ જ ચર્ચામાં રહેતું હોય છે. ત્યારે બિગ બોસની આ સિઝન પણ એટલી જ ચર્ચામાં છે અને ઝડપભેર આગળ પણ વધી રહી છે. હવે થોડા સમયમાં શોની ફિનાલે પણ થવાની છે. ત્યારે મેકર્સ અને સ્પર્ધકો બંને ગેમને લઈને ખૂબ જ ગંભીર થઈ ગયા છે. હાલમાં જ શોમાં ડબલ ઇવિક્શન પણ જોવા મળ્યું હતું.

બિગ બોસના વિકેન્ડ કા વારમાં માટે સલમાન ખાન કોના પર નિશાન સાધશે તે માટે એક અલગ જ પ્રકારે આતુરતા રહેતી હોય છે. જો કે આ શો માં સલમાન ખાને વિકેન્ડ કા વારમાં સૌથી પહેલા રિંકુ ધવન ત્યાર બાદ નીલ ભટ્ટને ઘરનો દરવાજો બતાવી દીધો હતો. ગત સપ્તાહ ઐશ્વર્યા શર્માને પણ શોમાંથી એક્ઝિટ આપવામાં આવી હતી. ત્યારે બિગ બોસ 17માંથી બહાર આવ્યા બાદ નીલ ભટ્ટે ઘરની અંદરની ઘણી વાતો શેર કરી છે.

નીલે બિગ બોસના ઘરની વાતો શેર કરતી વેળા આ સ્પર્ધાના સૌથી મજબૂત ખેલાડીનું નામ પણ જાહેર કર્યુ હતું. એક વાતચીત દરમિયાન નીલ ભટ્ટે વિજેતા વિશે જણાવ્યું હતું કે, બિગ બોસ 17ના સૌથી મજબૂત ખેલાડીઓ મુનાવર ફારુકી અને અભિષેક કુમાર છે. નીલે કહ્યું કે, આ બંનેમાંથી કોઈ એક બિગ બોસ 17ની ટ્રોફી ઉપાડી શકે છે, પરંતુ બંનેએ પોતાની રમતમાં સુધારો કરવો પડશે.

મુનાવર ફારુકી બિગ બોસ 17માં આયેશા ખાનને લઈને સતત ચર્ચામાં છે. તો આ તરફ અભિષેક કુમાર, ઈશા માલવીયા અને સમર્થ જુરેલ સાથેની લડાઈ શોની ખાસિયત રહી છે. નીલ ભટ્ટને લાગે છે કે જો મુનાવર ફારુકી અને અભિષેક કુમાર તેમની રમતને યોગ્ય બનાવે અને સાચા ટ્રેક પર પરત ફરે તો તેઓ વિજેતા બની શકે છે. બિગબોસની ટ્રોફી કોણ પોતાના નામે કરશે એ બાબતે નીલે તો સ્પષ્ટ કરી દીધી છે. હવે આ વાત કેટલી સાચી ઠરે છે તે આવનારો સમય કહેશે.