ખંભાળિયામાં શનિવારે મોટાભાગના નગરજનો તથા સ્થાનિક રહીશો પતંગ ઉત્સવની મોજ માણતા હતા, ત્યારે શહેરમાં બંધ કરવામાં આવેલા વીજ પુરવઠા વચ્ચે વીજ રીપેરીંગની કામગીરીમાં વીજ કર્મચારીઓ જોતરાયા હતા.


ખંભાળિયામાં પીજીવીસીએલ તંત્ર દ્વારા દર વર્ષે ઉતરાયણના દિવસે સાવચેતી સાથે જુના રીપેરીંગ કામ પૂર્ણ કરવા માટે વીજ પુરવઠો બંધ રાખવામાં આવે છે. તે મુજબ શનિવારે પણ શહેરમાં સવારે નવેક વાગ્યાથી વીજ પુરવઠો બંધ કરી દેવામાં આવ્યો હતો. અગાઉના વર્ષોમાં પતંગની દોરીના કારણે વીજ અકસ્માત થયાના બનાવો બન્યા હતા. જેથી સાવચેતીને ભાગરૂપે પીજીવીસીએલ દ્વારા વીજ પુરવઠો બંધ કરી દેવામાં આવે છે.




આ સાથે શનિવારે ટેકનિકલ સ્ટાફની રજા રદ કરી અને જુદા જુદા વિસ્તારોમાં વિવિધ પ્રકારની રીપેરીંગ કે લાઇન બદલવા જેવી કામગીરી આ દિવસે કરાય છે. આમ, ઉત્સાહના પર્વમાં પણ પીજીવીસીએલનો ટેકનિકલ સ્ટાફ ફરજ પર રહ્યો હતો અને તેમને સોંપવામાં આવેલી કામગીરી કરી હતી.