ચંદ્રયાન-૩ મિશન, સૂર્ય માટે આદિત્ય એલ-૧ અને શુક્ર્યાન તથા મંગળયાનની તૈયારી સાથે ભારતીય અવકાશ સંશોધન સંસ્થા (ઇસરો) હવે તેનું પ્રથમ સ્પેસ સ્ટેશન સ્થાપિત કરવાની યોજના બનાવી રહ્યું છે. ઈસરોના ચીફ એસ સોમનાથે સ્પેસ સ્ટેશન માટે ઈસરોની આ મોટી યોજનાની માહિતી આપી છે.

એક ઇન્ટરવ્યુમાં, ઇસરોના અધ્યક્ષે જણાવ્યું હતું કે ભારતીય અવકાશ એજન્સી સ્પેસ સ્ટેશન લોન્ચ અને લાંબા ગાળાના માનવ અવકાશ ઉડાન જેવા મિશન માટે વિવિધ શક્યતાઓ શોધી રહી છે. સોમનાથે કહ્યું કે, ચંદ્ર મિશનની સફળતા બાદ અમે તમામ શક્યતાઓ પર વિચાર કરી રહ્યા છીએ. અમે જોઈ રહ્યા છીએ કે સ્પેસ સ્ટેશન ભારતીય અવકાશ અર્થતંત્ર માટે કેવી રીતે ફાયદાકારક બની શકે છે, અમે તે પાસા પર ચર્ચા કરી રહ્યા છીએ.

૨૩ ઓગસ્ટ, ૨૦૨૩ના રોજ ચંદ્રના દક્ષિણ ધ્રુવ પર ચંદ્રયાન-૩ના સફળ ઉતરાણ બાદ, ઇસરોએ તેનું પ્રથમ સૌર મિશન આદિત્ય એલ-૧ પણ લોન્ચ કર્યું જેથી તેને લેગ્રેંગિયન પોઈન્ટ ૧ની આસપાસ પ્રભામંડળની ભ્રમણકક્ષામાં મૂકવામાં આવે. તે સૂર્યની દિશામાં પૃથ્વીથી ૧૫ લાખ કિમી દૂર સ્થિત છે. ભારતીય અવકાશ એજન્સી તેના ગગનયાન મિશન પર પણ કામ કરી રહી છે, જેનો હેતુ માનવ-વસવા યોગ્ય સ્પેસ કેપ્સ્યુલ વિકસાવવાનો છે. તે ત્રણ સભ્યોના ક્રૂને ત્રણ દિવસ સુધી અવકાશમાં લઈ જશે.