ધીરેન્દ્ર શાસ્ત્રીની મુસીબત ફરી વધી, મધ્ય પ્રદેશમાં અનેક જગ્યાએ વિરોધ


મધ્યપ્રદેશના છતરપુર અને દમોહ જિલ્લામાં બસોર સમુદાયના લોકોએ તેમના સમુદાય પર ટિપ્પણી કરવા બદલ બાબા વિરુદ્ધ કેસ નોંધવાની માંગ કરી છે. સમાજના લોકોએ ચીમકી પણ આપી છે કે જો તેમની સામે કાયદેસરની કાર્યવાહી કરવામાં નહીં આવે તો તેઓ સમગ્ર દેશમાં આંદોલન કરશે. બાગેશ્વર ધામના પ્રસિદ્ધ કથાકાર અને પીઠાધીશ્વર ફરી એકવાર વિવાદમાં છે. આ વખતે તેમની સામે આરોપ છે કે તેમણે દલિત બસોર (બાંશકર) સમુદાય પર વાંધાજનક ટિપ્પણી કરી છે. જેના કારણે આ સમાજ અપમાનની લાગણી અનુભવી રહ્યો છે. સમાજ વતી પોલીસને અનુસૂચિત જાતિ અને જનજાતિ અધિનિયમ હેઠળ ફરિયાદ આપવામાં આવી છે.


ફરિયાદની કારણભૂત ઘટના બાબાના દરબારમાં બની છે. રાજસ્થાનના સીકરમાં 2જી સપ્ટેમ્બરના રોજ પંડિત ધીરેન્દ્ર કૃષ્ણ શાસ્ત્રી તેમના દરબારમાં એક યુવક સાથે વાત કરી રહ્યા હતા. જ્યારે યુવકે બાબા બાગેશ્વરના પરચા પર વાંધો ઉઠાવ્યો તો ધીરેન્દ્ર શાસ્ત્રી સ્ટેજ પરથી જ ગુસ્સે થઈ ગયા. ત્યારે યુવકે કહ્યું કે તે પણ બ્રાહ્મણ છે. આના પર પંડિત ધીરેન્દ્ર કૃષ્ણ શાસ્ત્રીએ ગુસ્સામાં કહ્યું, 'તો હું શું બસોર છું?' આ પછી બાબા અને સ્ટેજ પર બેઠેલા યુવક વચ્ચે લાંબા સમય સુધી ચર્ચા ચાલી. આ ઘટનાનો વીડિયો પણ સોશિયલ મીડિયા પર વાઈરલ થયો છે. આ ઘટનાથી દુઃખી થઈને છતરપુરના દલિત બસોર સમુદાયે પંડિત ધીરેન્દ્ર કૃષ્ણ શાસ્ત્રી વિરુદ્ધ આજક પોલીસ સ્ટેશનમાં ફરિયાદ નોંધાવી છે. બસોર સમુદાયના લોકોએ આરોપ લગાવ્યો છે કે બાગેશ્વર બાબાએ સીકરના ખુલ્લા મંચ પરથી સમાજનું અપમાન કર્યું છે. તેમના નિવેદન બાદ સમાજના લોકો અપમાનની લાગણી અનુભવી રહ્યા છે.


બૌદ્ધ ધર્મ અપનાવશે સમાજ

બસોર સમુદાયના લોકોએ ચેતવણી આપી છે કે જો પંડિત ધીરેન્દ્ર શાસ્ત્રી વિરુદ્ધ અનુસૂચિત જાતિ અને જનજાતિ અધિનિયમ હેઠળ કેસ નોંધવામાં નહીં આવે તો તેઓ દેશભરમાં મોટું આંદોલન ચલાવશે. એટલું જ નહીં, બસોર સમુદાયના અગ્રણી લોકોએ કહ્યું છે કે જો બાગેશ્વર બાબા સામે કેસ નોંધવામાં નહીં આવે તો તેઓ સમગ્ર દેશમાં આંદોલન ચલાવશે અને બસોર સમુદાય છોડીને બૌદ્ધ ધર્મમાં જોડાશે. દમોહ જિલ્લામાં પણ બસોર બંશકર સમુદાયના લોકોએ બાબા વિરુદ્ધ કેસ નોંધવા માટે મેમોરેન્ડમ આપ્યું છે. તેમની માંગ છે કે બાબા પર દલિત અત્યાચારનો કેસ નોંધવો જોઈએ. જિલ્લાના તેંદુખેડમાં લોકો બાબા બાગેશ્વર વિરુદ્ધ રસ્તા પર ઉતરી આવ્યા હતા અને તેમના વિરુદ્ધ સૂત્રોચ્ચાર પણ કરવામાં આવ્યા હતા.