ગુજરાતના ડોન લતીફની જિંદગી પરથી શાહરુખ ખાનની સાથે સુપરહિટ રઈસ ફિલ્મ બનાવનારા ડાયરેક્ટર રાહુલ ધોળકિયાની મુંબઈના ફાયર ફાઈટર પરની ફિલ્મની ચર્ચાઓ લાંબા સમય થી ચાલતી હતી. વચ્ચે ફિલ્મનું થોડું કામ પણ શરુ થઇ ગયું હતું પણ અચાનક જ આ ફિલ્મ પર બ્રેક લાગી ગઇ હતી હવે ફરીવાર ફિલ્મનું કામકાજ શરુ થયું છે. ફિલ્મમાં કેટલાક ફેરફારો પણ કરવામાં આવ્યા છે. 

અગાઉ આ ફિલ્મનું ટાઈટલ ટેમ્પરરી 'ફાયર' નક્કી કરાયું હતું. તે બદલીને હવે 'અગ્નિ' કરી દેવામાં આવ્યું છે. ઉપરાંત ફિલ્મના મેઈન રોલ માટે સૈફ અલી ખાનનું નામ ચર્ચામાં હતું પણ હવે આ રોલ 'સ્કેમ ૧૯૯૨' ફેમ પ્રતીક ગાંધી કરશે આ ઉપરાંત મીર્ઝાપુર ફેમ મુન્ના ઉર્ફે દિવ્યેન્દુ શર્મા પણ આ ફિલ્મમાં મહત્વની ભૂમિકામાં જોવા મળશે.

મુંબઈના એક ફાયરમેન દ્વારા બહાદુરીથી ભીષણ આગ વચ્ચે કટોકટીના સંજોગોમાં કામગીરી બજાવવામાં આવી હતી એ વિષયને આધારિત આ ફિલ્મી વાર્તા વણાયેલી હોવાનું જણાય છે. સૈફ અલી ખાને આ ભૂમિકા કરવામાં ભારે ઉત્સાહ દાખવ્યો હતો. જોકે, સૈફ અલી ખાનની તારીખો મળવામાં વિલંબ થતાં અને કોવિડ પછીના સંજોગોના કારણે આ પ્રોજેક્ટમાં ઉત્તરોત્તર સમય વધતો ગયો હતો. 

આ ફિલ્મની સ્ક્રિપ્ટ રાહુલ ધોળકિયા તથા વિજય મોર્યાએ લખી હોવાનું જાણવા મળે છે. જોકે, પ્રોડયુસર તરીકે ફરહાન અખ્તર પણ તેમાં ક્રિએટિવ ઈનપૂટ આપશે એવી ચર્ચાઓ છે.  હાલ પ્રતિક ગાંધી પોતાની આ વર્ષે રીલીઝ થનારી ફિલ્મોમાં વ્યસ્ત છે. આ વર્ષે 'દેઢ બીઘા ઝમીન' જેમાં તેઓ ખુશાલી કુમાર સાથે જોવા મળશે. આ ઉપરાંત તેઓ 'વો લડકી હૈ કહાં' માં તાપસી પાનું સાથે સ્ક્રીન શેર કરતા જોવા મળશે.