વડાપ્રધાન નરેન્દ્ર મોદીએ પેરિસથી જાહેરાત કરી હતી કે UPIને લઈને ભારત અને ફ્રાન્સ વચ્ચે સમજૂતી થઈ છે. આ ઉપરાંત ભારતીય વિદ્યાર્થીઓના વિઝાનો સમયગાળો વધારવાની પણ જાહેરાત કરવામાં આવી હતી.

સિંગાપોર બાદ હવે ફ્રાન્સે પણ ભારતની યુનિફાઇડ પેમેન્ટ સિસ્ટમ (UPI) અપનાવી છે. વડાપ્રધાન નરેન્દ્ર મોદીએ તેમની ફ્રાંસ મુલાકાત દરમિયાન આ જાહેરાત કરી હતી. તેમણે કહ્યું કે ભારત અને ફ્રાન્સ યુપીઆઈના ઉપયોગ પર સહમત થયા છે. આ અંગે બંને દેશો વચ્ચે સમજૂતી થઈ છે. જે બાદ આગામી દિવસોમાં પ્રખ્યાત એફિલ ટાવરથી UPI શરૂ થશે. આનો સીધો અર્થ એ થયો કે હવે ભારતથી ફ્રાન્સ જતા પ્રવાસીઓ માત્ર રૂપિયામાં કંઈપણ ચૂકવી શકશે. આ સિવાય ફ્રાન્સે પણ ભારતીય વિદ્યાર્થીઓ માટે વિઝાની મુદત વધારવાની જાહેરાત કરી છે.

Be it India's UPI or other digital platforms, they have brought a huge social transformation in the country. pic.twitter.com/mSQmxgkB8e

— PMO India (@PMOIndia) July 13, 2023

વર્ષ 2022માં UPI સેવાઓ પૂરી પાડતી મોટી સંસ્થા નેશનલ પેમેન્ટ્સ કોર્પોરેશન ઓફ ઈન્ડિયા (NPCI) એ ફ્રાન્સની ઝડપી અને સુરક્ષિત ઓનલાઈન પેમેન્ટ સિસ્ટમ Lyra સાથે કરાર કર્યો હતો. ત્યારથી ફ્રાન્સમાં યુપીઆઈના લોન્ચની રાહ જોવાઈ રહી હતી.

પીએમ મોદીની ફ્રાંસ મુલાકાત દરમિયાન ભારતીય વિદ્યાર્થીઓને પણ રાહત આપવાની જાહેરાત કરવામાં આવી હતી. જેમાં કહેવામાં આવ્યું હતું કે માસ્ટર્સ કરતા વિદ્યાર્થીઓના વિઝાનો સમયગાળો હવે 5 વર્ષ સુધી વધારી શકાશે. આ અંગે પીએમ પીએમ મોદીએ કહ્યું કે ફ્રાન્સે અનુસ્નાતક અભ્યાસ કરી રહેલા વિદ્યાર્થીઓને લાંબા ગાળાના પાંચ વર્ષના વિઝા આપવાનો નિર્ણય કર્યો છે. વડાપ્રધાને ભારતીય સમુદાયના લોકોને ભારતમાં મોટા પાયે રોકાણ કરવાની અપીલ પણ કરી હતી. તેમણે કહ્યું કે ભારત એક વિકસિત રાષ્ટ્ર તરીકે ઉભરવા માટે ઝડપથી પ્રગતિ કરી રહ્યું છે. મોદીએ કહ્યું, “આજે દરેક રેટિંગ એજન્સી કહી રહી છે કે ભારત એક તેજસ્વી સ્થળ છે. હવે ભારતમાં રોકાણ કરો. આ યોગ્ય સમય છે. જે લોકો વહેલું રોકાણ કરે છે તેમને તેનો લાભ મળશે.