તમે આજ સુધી અનેક પ્રકારની ભૂતની વાર્તાઓ વાંચી અને સાંભળી હશે. જેમાં એક વ્યક્તિ મૃત્યુ છતાં તેના સ્વજનો પાસે આવે છે. જો કે, ક્યારેક એવું બને છે કે વાર્તા ભૂત વિશે નથી હોતી. પરંતુ આ એક અલગ લેવલનું કૌભાંડ હોય છે. જેના વિશે જાણ્યા બાદ દુનિયા ચોંકી ઊઠે છે. આવી જ એક કહાની આજકાલ લોકોમાં ચર્ચાઈ રહી છે. જેમાં એક મહિલાએ મૃત્યુ બાદ 14 વર્ષ સુધી કામ કર્યું અને પછી પેન્શન પણ લીધું.

આ દિવસોમાં ચીનમાંથી આ વિચિત્ર કિસ્સો સામે આવ્યો છે. જ્યાં એક મહિલાનું રોડ અકસ્માતમાં મૃત્યુ થયું હતું, પરંતુ તેમ છતાં કંપનીના રેકોર્ડ મુજબ તે જે ફેક્ટરીમાં કામ કરતી હતી ત્યાં કામ કરવા આવતી હતી. આશ્ચર્યજનક વાત એ છે કે તેણે 14 વર્ષ કામ કર્યું અને તેણે વર્ષ 2023 સુધી તેનું પેન્શન પણ લીધું, જેના માટે તેને પેન્શન તરીકે 393,676 યુઆન મળતા રહ્યા. હવે તમારા મનમાં પ્રશ્ન અવશ્ય ઉઠતો હશે કે મૃત્યુ પછી કોઈ નોકરી કેવી રીતે કરી શકે?

અહેવાલ અનુસાર, 1993માં વુહાનમાં એક ફેક્ટરીમાં કામ કરતી ઈનર મંગોલિયાની એક મહિલાનું રોડ એક્સિડન્ટમાં મોત થયું હતું, પરંતુ તેમ છતાં તેણે 2007 સુધી ફેક્ટરીમાં કામ કર્યું અને 2023 સુધી પેન્શન એકત્રિત કર્યું. પરંતુ વાસ્તવમાં તેની બહેન તેની જગ્યાએ કામ પર જતી હતી. હકીકતમાં, કાર અકસ્માતમાં તેની બહેનના મૃત્યુ પછી, મહિલાએ ચૂપચાપ તેનું આઈડી લીધું અને તેની ફેક્ટરીમાં કામ કરવા લાગી.

અહીં નવાઈની વાત એ છે કે બંને જોડિયા પણ નહોતા, છતાં મહિલાએ 14 વર્ષ ફેક્ટરીમાં કામ કર્યું અને 16 વર્ષ સુધી પેન્શન લીધું. જો કે, જ્યારે આ છેતરપિંડીનો પર્દાફાશ થયો ત્યારે મહિલાએ બધું જ સ્વીકાર્યું અને પૈસા ચૂકવવાનું પણ કહ્યું. હવે આ મહિલાને 3 વર્ષની કેદ અને લગભગ 3 લાખ રૂપિયાનો દંડ ભરવાનું કહેવામાં આવ્યું છે. ઈન્ટરનેટ પર આ સ્ટોરી આવતા જ બધાએ કહ્યું કે કોઈ આટલી મોટી છેતરપિંડી કેવી રીતે કરી શકે.