કેન્દ્રીય મંત્રી અશ્વિની વૈષ્ણવે આજે લોકસભામાં ડિજિટલ પર્સનલ ડેટા પ્રોટેક્શન બિલ, 2023 રજૂ કર્યું છે. ઉલ્લેખનીય છે કે, કેન્દ્રીય ઈલેક્ટ્રોનિક્સ અને ઈન્ફોર્મેશન ટેક્નોલોજી રાજ્ય મંત્રી રાજીવ ચંદ્રશેખરે ગતરોજ કહ્યું હતું કે સરકાર ગુરુવારે સંસદમાં ડિજિટલ પર્સનલ ડેટા પ્રોટેક્શન (DPDP) બિલ રજૂ કરી શકે છે.

જો કે, કોંગ્રેસે આ બિલનો વિરોધ કર્યો છે. લોકસભામાં ડિજિટલ પર્સનલ ડેટા પ્રોટેક્શન બિલ, 2023ની રજૂઆત પર કોંગ્રેસના સાંસદ અધીર રંજન ચૌધરીએ કહ્યું કે હું બિલનો વિરોધ કરું છું. આ બિલ દ્વારા સરકાર માહિતીના અધિકાર, કાયદા અને ગોપનીયતાના અધિકારને કચડી નાખશે.

કોંગ્રેસ સાંસદે કહ્યું કે અમે આ સરકાર દ્વારા દર્શાવવામાં આવી રહેલા આવા ઇરાદાઓનો સખત વિરોધ કરી રહ્યા છીએ. આ બિલને સ્થાયી સમિતિ અથવા અન્ય કોઈ ફોરમમાં ચર્ચા માટે મોકલવાની જરૂર છે.

PDPD બિલ દરખાસ્ત કરે છે કે ઉલ્લંઘનની ઘટના માટે ₹250 કરોડ સુધીનો દંડ લાદવામાં આવી શકે છે. સરકારે કહ્યું કે DPDP એક મહત્વપૂર્ણ કાયદો છે જે ભારતમાં વ્યક્તિગત ડેટાની સુરક્ષાને વધારશે. આ બિલનો અમલ પર્સનલ ડેટાના યુઝર્સને તેમની પ્રાઇવસીની સુરક્ષા અને તેમના ડેટાના દુરુપયોગને ટાળવામાં મદદ કરશે. સરકારના જણાવ્યા અનુસાર, બિલ વ્યક્તિગત ડિજિટલ ડેટાના ઉપયોગને સુરક્ષિત કરવાનો પ્રયાસ કરે છે. યુઝર્સની ફરજો સુનિશ્ચિત કરતી વખતે એકત્રિત ડેટાનો કાયદેસર ઉપયોગ કરવા માટે યુઝર્સની જવાબદારીઓ નક્કી કરે છે. આ બિલ એ સિદ્ધાંતો પર આધારિત છે કે વ્યક્તિગત ડેટાનો સંગ્રહ અને ઉપયોગ કાયદેસર અને પારદર્શક હોવો જોઈએ. જ્યાં સુધી હેતુ પૂરો ન થાય ત્યાં સુધી ડેટા સુરક્ષિત રીતે સંગ્રહિત થવો જોઈએ. વ્યક્તિઓનો સંબંધિત ડેટા એકત્રિત કરવો જોઈએ. અને પૂર્વ-નિર્ધારિત ઉદ્દેશ્યની પરિપૂર્ણતા એ એકમાત્ર ઉદ્દેશ્ય હોવો જોઈએ. ઉપરાંત, ડેટાની ચોકસાઈ પણ મહત્વપૂર્ણ છે.