સાત વર્ષ પહેલા ચીને આર્જેન્ટિનામાં શરુ કર્યું હતું પોતાનું સિક્રેટ સ્પેસ સ્ટેશન : અહીંથી અમેરિકા પર ડ્રેગન જસુસી કરતો હોવાના લાગી ચુક્યા આરોપ 

ચીન છેલ્લા સાત વર્ષથી આર્જેન્ટિનામાં સિક્રેટ સ્પેસ સ્ટેશન ચલાવી રહ્યું છે. આ બેઝ માટે 2014માં ચીન અને આર્જેન્ટિના વચ્ચે કરાર થયો હતો. આ સ્પેસ સ્ટેશન 200 હેક્ટર જમીનમાં ફેલાયેલું છે. તેનું નામ એસ્પેસિયો લેઝાનો સ્ટેશન છે, જે આર્જેન્ટીનાના ન્યુક્વેન પ્રાંતમાં આવેલું છે. ચીને આ જગ્યાએ 16 માળનું એન્ટેના પણ લગાવ્યું છે, જેના દ્વારા સરળતાથી નજર રાખી શકાય છે. ચીનના પીપલ્સ લિબરેશન આર્મી સ્ટ્રેટેજિક સપોર્ટ ફોર્સ દ્વારા નિયંત્રિત આ સ્ટેશન પર ચાઇના સેટેલાઇટ લૉન્ચ અને ટ્રેકિંગ કંટ્રોલ જનરલના કર્મચારીઓ કામ કરે છે. આવી સ્થિતિમાં ચીન આ સ્પેસ સ્ટેશનથી અમેરિકાના આકાશમાં પણ જાસૂસી કરી શકે તેવી આશંકા છે.

આ ચાઇનીઝ સ્પેસ સ્ટેશન આર્જેન્ટિનાના દક્ષિણ-પશ્ચિમ પ્રાંત ન્યુક્વેનના બાજાદા ડેલ એગ્રિઓ ગામથી 18 માઇલ દૂર સ્થિત છે. આ સ્ટેશનની સ્થાપના 2014માં ચીન અને તત્કાલિન રાષ્ટ્રપતિ ક્રિસ્ટિના ફર્નાન્ડીઝ ડી કિર્ચનરના વહીવટીતંત્ર વચ્ચેના કરાર દ્વારા કરવામાં આવી હતી. આર્જેન્ટિનાની સંસદે ફેબ્રુઆરી 2015 સુધીમાં ચીની સ્ટેશનને મંજૂરી આપી ન હતી. જોકે, બાંધકામ 2013માં શરૂ થઈ ચૂક્યું હતું અને તે 2017માં પૂર્ણ થયું હતું. આ બેઝ ચીનને 50 વર્ષ માટે લીઝ પર આપવામાં આવ્યું છે. આર્જેન્ટિનાને શંકા છે કે ચીન આ બેઝને લઈને થયેલા કરારનું પાલન નથી કરી રહ્યું. આ આધારને કારણે વિસ્તારના રહીશોમાં પણ અસ્વસ્થતાનો માહોલ સર્જાયો છે. અમેરિકન પ્રશાસને પણ આર્જેન્ટિનાના આ બેઝ અંગે વાંધો વ્યક્ત કર્યો છે.

આર્જેન્ટિનાના રાષ્ટ્રપતિ કાર્યાલયના એક સ્ત્રોતે જણાવ્યું હતું કે રાષ્ટ્રપતિ જાવિઅર મેલી સિક્રેટ ચાઇનીઝ બેઝનું નિરીક્ષણ કરવા પર વિચાર કરી રહ્યા છે. તેનો હેતુ ન્યુક્વેન પ્રાંતમાં ચીની બેઝ સાથે જોડાયેલ કોઈપણ સંભવિત અનિયમિતતાનું મૂલ્યાંકન કરવાનો છે. અહેવાલમાં વિગતવાર જણાવાયું છે કે કરારમાં નિયત કરવામાં આવ્યું હતું કે "બેઝના દસ ટકા સંસાધનો આર્જેન્ટિના દ્વારા ઉપયોગમાં લેવાના હતા,"  એટલે હવે કોન્ટ્રેક્ટમાં શું સ્થાપિત કરવામાં આવ્યું હતું, શું બનાવવામાં આવ્યું હતું અને શું બનાવવામાં આવ્યું નથી તે તપાસવું મહત્વપૂર્ણ છે.

આર્જેન્ટીનાનો આ નિર્ણય ડેનમાર્કથી 24 જૂના એફ-16 ફાઈટર એરક્રાફ્ટ ખરીદવાના તાજેતરના નિર્ણય બાદ આવ્યો છે. આ રેસમાં ચીનનું જેએફ-17 ફાઈટર પ્લેન પણ સામેલ હતું, જેને આર્જેન્ટિનાએ ફગાવી દીધું હતું. ચીને જેએફ -17ને લઈને આર્જેન્ટિનાને ઘણી આકર્ષક ઓફર પણ કરી હતી. જો કે, નવા પ્રમુખ જેવિયર મેલી આર્જેન્ટિના વધુને વધુ પશ્ચિમી સરકારો સાથે પોતાને સંરેખિત કરી રહ્યા છે.