કોંગ્રેસના રાજ્યસભા સાંસદ અને વરિષ્ઠ વકીલ વીકે ટંખાએ આપી માહિતી કહ્યું, “કોંગ્રેસ વધુ નબળી પડશે”

લોકસભા ચૂંટણી પહેલા કોંગ્રેસ સામે વધુ એક મોટી કાર્યવાહી થઈ શકે છે. આવકવેરા વિભાગ પાર્ટી પાસેથી રૂ. 523.86 કરોડની વસૂલાત કરી શકે છે. કોંગ્રેસે આ નાણાંનો કોઈ હિસાબ આઈટી વિભાગને આપ્યો નથી. આ વ્યવહારો 2014 થી 2021 વચ્ચે કરવામાં આવ્યા છે. આ પહેલા પણ આઈટીએ કોંગ્રેસના બેંક ખાતામાંથી 135 કરોડ રૂપિયા ઉપાડી લીધા હતા.

અહેવાલ મુજબ, 2019ની લોકસભા ચૂંટણી પહેલા કરવામાં આવેલા આઈટીના દરોડામાં 523.86 કરોડ રૂપિયાના વ્યવહારો શોધી કાઢવામાં આવ્યા હતા. કોંગ્રેસના રાજ્યસભા સાંસદ અને વરિષ્ઠ વકીલ વીકે ટંખાએ આ અંગેની માહિતી આપી છે. તેમણે કહ્યું છે કે કોંગ્રેસ પાર્ટીને ડર છે કે 523.87 કરોડ રૂપિયામાં જંગી દંડ અને વ્યાજ ઉમેરવામાં આવશે. આ પહેલા 135 કરોડ રૂપિયાની રકમ મામલે પાર્ટીને ફટકો પડ્યો હતો. ટંખાએ વધુમાં જણાવ્યું હતું કે અમે આગામી કાર્યવાહીથી હજુ મોટા ફટકાની અપેક્ષા રાખીએ છીએ. જેના કારણે કોંગ્રેસ વધુ નબળી પડી શકે છે.

આ મહિને કોંગ્રેસ પાર્ટીએ ઈન્કમ ટેક્સ એપેલેટ ટ્રિબ્યુનલમાં અપીલ દાખલ કરી હતી. જેમાં પાર્ટીના બેંક ખાતામાંથી 135 કરોડ રૂપિયા ઉપાડવા પર પ્રતિબંધ લગાવવાની માંગ કરવામાં આવી હતી. પરંતુ તેની અપીલ ફગાવી દેવામાં આવી હતી. ત્યારબાદ 22 માર્ચે પાર્ટીએ દિલ્હી હાઈકોર્ટનો સંપર્ક કર્યો હતો. કોંગ્રેસે આવકવેરા વિભાગની શોધખોળને પડકારી હતી. પાર્ટીએ કહ્યું કે આ કાર્યવાહી ખૂબ મોડેથી કરવામાં આવી છે. પરંતુ હાઈકોર્ટ કોંગ્રેસ સાથે સહમત ન થઇ.

દિલ્હી હાઈકોર્ટે દરોડા દરમિયાન એકત્રિત કરવામાં આવેલા પુરાવાઓને સૂચિબદ્ધ કર્યા, જે દર્શાવે છે કે એમઇઆઈએલ ગ્રુપ (મેઘા એન્જિનિયરિંગ એન્ડ ઈન્ફ્રાસ્ટ્રક્ચર લિમિટેડ) ના કર્મચારીઓની શોધમાં પણ કોંગ્રેસ પક્ષને ચૂકવણીના પુરાવા મળ્યા હતા. ઈલેક્ટોરલ બોન્ડ પર તાજેતરમાં જાહેર કરાયેલા ડેટામાં મેઘા ગ્રુપ રાજકીય પક્ષોને બીજા સૌથી મોટા દાન આપનાર તરીકે ઉભરી આવ્યું હતું. તેની ગ્રુપ કંપનીએ ઓક્ટોબર-નવેમ્બર 2023 દરમિયાન કોંગ્રેસને રૂ. 110 કરોડનું દાન આપ્યું હતું. કાર્યવાહી દરમિયાન કોંગ્રેસના વકીલોએ દિલ્હી હાઈકોર્ટને માહિતી આપી હતી કે 2019ની લોકસભા ચૂંટણી માટે ઓડિટેડ ખર્ચ રૂ. 860 કરોડ હતો. વીકે ટંખા, જેમણે દલીલ કરી હતી અને દિલ્હી હાઈકોર્ટમાં પણ હાજર થયા હતા તે સ્વીકારે છે કે પાર્ટી 2024ની ચૂંટણી માટે આવા ખર્ચની કલ્પના કરી શકતી નથી. તેણે કહ્યું, “લેવલ પ્લેઇંગ ફિલ્ડ ક્યાં છે? કોણ જાણે છે કે 2019ના દરોડા અને સર્ચ માટે કેટલા કરોડની ડિમાન્ડ હશે?''

રાજ્યસભાના સભ્ય દિગ્વિજય સિંહે પણ કહ્યું કે કોંગ્રેસ પાર્ટી ગંભીર રીતે રોકડની તંગી છે. કોંગ્રેસે કેન્દ્ર સરકાર પર પાર્ટીના બેંક એકાઉન્ટ ફ્રીઝ કરવાનો આરોપ લગાવ્યો છે. આ પહેલા કોંગ્રેસ અધ્યક્ષ મલ્લિકાર્જુન ખડગેએ તેને અલોકતાંત્રિક ગણાવ્યું હતું અને કહ્યું હતું કે, "સમાન ધોરણે ચૂંટણી લડવા સક્ષમ ન હોવાના કારણે જ બેંક ખાતા જપ્ત કરવામાં આવ્યા છે. એક રાજકીય પક્ષ માટે અડચણો ઊભી કરીને ખતરનાક રમત રમાઈ છે. ભાજપની દરેક જગ્યાએ ફાઈવ સ્ટાર ઓફિસો છે. સરકારના ચૂંટણી ખર્ચનો કોઈ હિસાબ નથી. ભાજપે ક્યારેય તેના બેંક ખાતાની વિગતો આપી નથી. ચૂંટણી સમાન શરતો પર થવી જોઈએ. ભાજપ ક્યારેય કર ચૂકવતી નથી, પરંતુ અમારી પાસેથી માંગ કરે છે."