ચેન્નાઈ સુપર કિંગ્સ 10મી વખત IPLની ફાઇનલમાં જગ્યા બનાવવામાં સફળ રહી હતી. ચેન્નાઈના ચાહકોને આશા છે કે આ વખતે ટીમ તેની પાંચમી ટ્રોફી જીતશે. ધોનીની કપ્તાનીમાં ચેન્નાઈ અત્યાર સુધી ચાર ટાઈટલ જીતી ચૂક્યું છે. જ્યારે મહેન્દ્ર સિંહ ધોની આઈપીએલ 2023ની ટાઈટલ મેચ દ્વારા તેની 250મી આઈપીએલ મેચ રમશે. આ મેચ પહેલા બીસીસીઆઈએ એમએસ ધોનીને ખાસ ટ્રીબ્યુટ આપ્યું છે.

IPL દ્વારા એક વીડિયો શેર કરવામાં આવ્યો હતો, જેમાં પીચ ક્યુરેટરથી લઈને સિક્યુરિટી ગાર્ડ સુધી બધાએ ધોની વિશે વાત કરી હતી. વીડિયોમાં ધોનીના ઘણા ફેન્સ દેખાયા હતા. તેમાં એક નાનો ફેન પણ જોવા મળ્યો હતો. બધાએ ધોની વિશે વાત કરી અને ધોની સાથે જોડાયેલી પોતાની યાદો શેર કરી. મહેન્દ્ર સિંહ ધોની IPL ફ્રેન્ચાઇઝી ચેન્નાઈ સુપર કિંગ્સ માટે હંમેશા આધારસ્તંભ રહ્યો છે.

મહેન્દ્ર સિંહ ધોની આ સિઝનમાં બેટ્સમેન તરીકે શાનદાર ફોર્મમાં જોવા મળી રહ્યો છે. 11 ઇનિંગ્સમાં બેટિંગ કરતી વખતે ધોનીએ 34.67ની એવરેજ અને 185.71ની સ્ટ્રાઇક રેટથી 104 રન બનાવ્યા છે. આમાં તેનો હાઈ સ્કોર અણનમ 32 રહ્યો છે. આ દરમિયાન તેના બેટમાંથી 10 છગ્ગા જોવા મળ્યા છે.

આ સિઝનની શરૂઆતથી જ મહેન્દ્ર સિંહ ધોનીની IPL નિવૃત્તિની ચર્ચાઓ વધી રહી છે. ધોની આગામી સિઝનમાં રમશે કે નહીં તેની સત્તાવાર રીતે કોઈને ખબર નથી. ટૂર્નામેન્ટ દરમિયાન એક મેચ બાદ આ વિશે વાત કરતા ધોનીએ કહ્યું કે તેની પાસે નિર્ણય લેવા માટે 8-9 મહિનાનો સમય છે.

ફ્રેન્ચાઇઝીના સીઇઓ કાસી વિશ્વનાથન પણ ધોની આગામી સિઝનમાં રમવાની અપેક્ષા રાખી રહ્યા છે. વિશ્વનાથનને પણ ખબર નથી કે ધોની આગામી સિઝનમાં રમશે કે નહીં. હવે જોવું એ રસપ્રદ રહેશે કે આ સિઝન બાદ ધોની શું નિર્ણય લે છે.