કેટલાક બદમાશોએ એઆઈએમઆઈએમના વડા અને હૈદરાબાદના સાંસદ અસદુદ્દીન ઓવૈસીના ઘર પર કાળી શાહી નાખી અને તોડફોડ પણ કરી. ઓવૈસીએ X પર આ માહિતી આપી છે. ઓવૈસીએ કહ્યું કે તેમણે આ અંગે દિલ્હી પોલીસને ફરિયાદ કરી હતી પરંતુ તેઓએ કોઈ કાર્યવાહી કરી ન હતી. હૈદરાબાદના સાંસદે આ કૃત્ય માટે ગૃહમંત્રી અમિત શાહ અને લોકસભાના અધ્યક્ષ ઓમ બિરલાને પણ સવાલ કર્યા છે.

ટ્વિટર પર ટ્વીટ કરતા ઓવૈસીએ કહ્યું, "આજે મારા ઘરને કેટલાક અજાણ્યા બદમાશો દ્વારા કાળો રંગ લગાવીને તોડફોડ કરવામાં આવી હતી. મારા દિલ્હીના ઘર પર કેટલી વાર હુમલો થયો તેની ગણતરી હવે મને યાદ નથી. જ્યારે મેં દિલ્હી પોલીસના અધિકારીઓને પૂછ્યું કે આ તેમના નાક હેઠળ કેમ થઈ રહ્યું છે તો તેઓ કઈ જવાબ આપી ન શક્યા."

ઓવૈસીએ કેન્દ્રીય ગૃહમંત્રી અમિત શાહને સંબોધતા કહ્યું કે, અમિત શાહ જી, આ બધું તમારી દેખરેખમાં થઈ રહ્યું છે. આ સિવાય તેમણે લોકસભા સ્પીકર ઓમ બિરલાને પણ પૂછ્યું કે, "કૃપા કરીને જણાવો કે શું સાંસદોની સુરક્ષા સુનિશ્ચિત કરવામાં આવશે કે નહીં."

અસદુદ્દીન ઓવૈસીએ પોતાના નિવેદનમાં સ્પષ્ટ કર્યું છે કે તેમને આવા હુમલાઓથી ડરાવી શકાય નહીં. તેમણે આ ઘટનાઓને કાયરતાપૂર્ણ કૃત્યો ગણાવી અને જો તેઓમાં હિંમત હોય તો તેમનો સીધો સામનો કરવા પડકાર ફેંક્યો છે. પોતાના ટ્વીટમાં ઓવૈસીએ તેમના ઘરને નિશાન બનાવનારાઓને કડક ચેતવણી પણ આપી છે.