એક વીડિયો જાહેર કરીને પાકિસ્તાની ગાયક રાહત ફતેહ અલી ખાનની ધરપકડના સમાચારને નકારી કાઢવામાં આવ્યા છે. સમાચારમાં જણાવવામાં આવ્યું હતું કે દુબઈ એરપોર્ટ પરથી પોલીસે તેની ધરપકડ કરી લીધી છે.

સોમવારે મીડિયામાં એવા સમાચાર આવ્યા હતા કે ગાયકની દુબઈ એરપોર્ટ પરથી ધરપકડ કરવામાં આવી છે. આ મામલો તેના પૂર્વ મેનેજર સાથે સંબંધિત હોવાનું કહેવાય છે. છેલ્લા કેટલાક મહિનાઓથી પાકિસ્તાની સિંગરનો તેના પૂર્વ મેનેજર સલમાન અહેમદ સાથે વિવાદ ચાલી રહ્યો હતો. તેણે સલમાનને નોકરીમાંથી પણ કાઢી મૂક્યો હતો. આ વિવાદ વચ્ચે સલમાને દુબઈમાં તેની સામે ફરિયાદ નોંધાવી હતી.

રાહત ફતેહ અલી ખાન એક મ્યુઝિકલ શોમાં પરફોર્મ કરવા દુબઈ ગયા હતા. જ્યાં બુર્જ દુબઈ પોલીસે તેની દુબઈ એરપોર્ટ પરથી ધરપકડ કરી હતી. જો કે, હવે ગાયકે આ તમામ સમાચારોને માત્ર અફવા ગણાવી છે અને ચાહકોને તેના પર વિશ્વાસ ન કરવા કહ્યું છે.

આ પહેલીવાર નથી જ્યારે રાહત ફતેહ અલી ખાન કોઈ વિવાદમાં ફસાયા હોય. આ પહેલા તેમના સ્ટુડન્ટને માર મારવાનો મામલો પણ સામે આવ્યો હતો. ગાયકનો એક વીડિયો વાયરલ થયો હતો જેમાં તે નશામાં ધૂત અને ઘરના મદદગારને મારતો જોવા મળ્યો હતો. વીડિયોમાં ગાયક એક બોટલ વિશે પૂછી રહ્યો હતો અને તેને ચપ્પલ વડે મારતો હતો. આ વીડિયો પર સ્પષ્ટતા કરતા ગાયકે તેને પોતાનો શિષ્ય ગણાવ્યો હતો અને કહ્યું હતું કે આ એક ગુરુ અને શિષ્ય વચ્ચેનો સંબંધ છે, જેને તે પોતાની સ્ટાઈલમાં બોટલ વિશે પૂછી રહ્યો હતો. આ માટે તેની ઘણી ટીકા થઈ હતી.