બોલિવૂડના મહાનાયક અમિતાભ બચ્ચન રમતગમતમાં ઊંડો રસ ધરાવે છે. ખાસ કરીને તેમણે ક્રિકેટ અને ફૂટબોલમાં વધુ રસ છે, પરંતુ તે અન્ય રમતોમાં પણ રસ લે છે. અમિતાભ બચ્ચને હાલમાં જ બુડાપેસ્ટ, હંગેરીમાં ચાલી રહેલી વર્લ્ડ એથ્લેટ ચેમ્પિયનશિપની  એક પોસ્ટ શેર કરી છે, જેમાં તેઓ ફાઇનલમાં પહોંચવા બદલ ભારતના વખાણ કરી રહ્યા છે અને ભારત વિષે કઈ ન બોલવા પર  તેઓએ કોમેન્ટેટર્સ પર ટીપ્પણી પણ કરી છે.

અમિતાભ બચ્ચને ઉદ્યોગપતિ આનંદ મહિન્દ્રાનું એક ટ્વિટ શેર કર્યું છે. આ ટ્વીટમાં આનંદે વર્લ્ડ એથ્લેટિક્સ ચેમ્પિયનશિપની ફાઇનલમાં જગ્યા બનાવનાર ભારતીય યુવાનોની પ્રશંસા કરી છે. અમિતાભ બચ્ચને પણ આ જ પોસ્ટ પોતાના ટ્વિટર પર શેર કરી છે અને ખેલાડીઓને ફાઇનલમાં પહોંચવા બદલ અભિનંદન પાઠવ્યા છે. આ સાથે બિગ બીએ લખ્યું- અને ભારત, જય હિંદ, સમગ્ર વિશ્વમાંથી ભારતને અભિનંદન. અને મેં હમણાં જ કોમેન્ટરી સાંભળી. જેમાં ક્વોલિફાય કરી અને બીજું સ્થાન મેળવ્યું છતાં ભારતીય ટીમ માટે એક પણ શબ્દ બોલાયો ન હતો. માત્ર ત્રીજા અને ચોથા નંબરની જ વાત થઈ.

ભારતે રિલે રેસમાં દરેકને હરાવીને 2:59:05માં રિલે પૂરી કરી અને બીજું સ્થાન મેળવ્યું છે. ભારત તરફથી મોહમ્મદ અનસ, મોહમ્મદ અજમલ, અમોજ જેકબ અને રાજેશ રમેશે આ પદ હાંસલ કરવા માટે મહેનત કરી હતી. યુએસએ 2:58:47 ના સમય સાથે પ્રથમ સ્થાને છે.