સુપ્રીમ કોર્ટે શુક્રવારે બિલકિસ બાનો કેસમાં ત્રણ દોષિતોની શરણાગતિના સમયમાં છૂટની માંગ કરતી અરજીને ફગાવી દીધી હતી. આ કેસમાં 11માંથી ત્રણ દોષિતોએ આત્મસમર્પણનો સમયગાળો વધારવા માટે વિનંતી કરી હતી. 8 જાન્યુઆરીના રોજ સુપ્રીમ કોર્ટે 11 દોષિતોને મુક્ત કરવાના ગુજરાત સરકારના નિર્ણયને રદ કર્યો હતો. કોર્ટે તમામ આરોપીઓને બે સપ્તાહમાં આત્મસમર્પણ કરવાનું કહ્યું હતું. આ મુજબ તમામ આરોપીઓએ 21 જાન્યુઆરીએ આત્મસમર્પણ કરીને જેલમાં જવું પડશે.

તમામ 11 દોષિતોમાંથી ત્રણ દોષિતોએ અંગત કારણોસર 4 થી 6 સપ્તાહનો વધુ સમય માંગ્યો હતો, જેને સુપ્રીમ કોર્ટે ફગાવી દીધો હતો. તેમની અરજીઓને ફગાવી દેતા સર્વોચ્ચ અદાલતે કહ્યું હતું કે શરણાગતિની તારીખ મુલતવી રાખવા માટે દોષિતો દ્વારા ટાંકવામાં આવેલા કારણોમાં કોઈ યોગ્યતા નથી.

મહત્વનું છે કે 11 દોષિતોમાંથી ત્રણ દોષિતોએ સુપ્રીમ કોર્ટમાં અરજી દાખલ કરી હતી. જેમાં તેમણે આત્મસમર્પણની અવધિ વધારવાની માંગ કરી હતી. ગોવિંદ નાઈએ કોર્ટ પાસેથી 4 સપ્તાહ જ્યારે મિતેશ ભટ્ટ અને રમેશ ચંદનાએ 6 સપ્તાહના એક્સટેન્શનની માંગણી કરી હતી. આ ગુનેગારોએ અંગત કારણો દર્શાવ્યા હતા. જે માન્ય રાખવામાં આવ્યા નથી. આમ, તમામ દોષિતો માટે શરણાગતિની સમયમર્યાદા 21મી જાન્યુઆરીએ પૂરી થઇ રહી છે.