વોટ્સએપ બાદ અમેરિકાની આઈફોન મેન્યુફેક્ચરિંગ કંપની એપલે એપ સ્ટોરમાંથી 2 વધુ એપ્સ હટાવી દીધી છે. એક દિવસ પહેલા જ અમેરિકન મીડિયાએ દાવો કર્યો હતો કે એપલે ચીનના એપ સ્ટોરમાંથી WhatsAppને હટાવવાનો નિર્ણય લીધો છે. ચીનના ટોચના ઈન્ટરનેટ નિયમનકારે કંપનીને રાષ્ટ્રીય સુરક્ષાની ચિંતાઓને કારણે ચીનના એપ સ્ટોર્સમાંથી એપ્સને દૂર કરવા કહ્યું છે. આ પછી એપલના એપ સ્ટોર પરથી સિગ્નલ અને ટેલિગ્રામ એપ્સ હટાવી દેવામાં આવ્યા છે.

ચીનમાં જે iOS એપ્સ પર પ્રતિબંધ છે તેમાં મેટા પ્લેટફોર્મ ફેસબુક, ઈન્સ્ટાગ્રામ અને વોટ્સએપ સામેલ છે. ચીનની સરકારે પહેલાથી જ વીડિયો સ્ટ્રીમિંગ પ્લેટફોર્મ યુટ્યુબ અને વિકિપીડિયા પર પ્રતિબંધ લગાવી દીધો છે. હવે ચીનમાં Appleના એપ સ્ટોર પર સિગ્નલ અને ટેલિગ્રામ એપ્સ પણ ઉપલબ્ધ નહીં હોય.

ચીનનું ઉદ્યોગ અને આઈટી મંત્રાલય માહિતીના પ્રવાહ પર તેની પકડ મજબૂત કરી રહ્યું છે. આ નિર્ણય ઓનલાઈન કન્ટેન્ટને નિયંત્રિત કરવાનો પ્રયાસ છે. જે દેશી અને વિદેશી કંપનીઓને ચીનની સરકાર દ્વારા રાજકીય રીતે સંવેદનશીલ ગણાતી માહિતીની ઍક્સેસને પ્રતિબંધિત કરવા દબાણ કરે છે. ગયા વર્ષે ઓગસ્ટમાં ચીની સત્તાવાળાઓએ તમામ મોબાઈલ એપ ડેવલપર્સને માર્ચ 2024 સુધીમાં સરકારી નોંધણી કરાવવાનો નિર્દેશ આપ્યો હતો.