ગૂગલ ફોટોઝમાં અમેઝિંગ AI ફીચર ઉમેરવામાં આવ્યું છે. આ ફીચર દ્વારા યુઝર્સ વોઇસ કમાન્ડથી પોતાના મનપસંદ ફોટો શોધી શકશે. ગૂગલે તેના AI આધારિત ફીચરનું નામ Ask Photos રાખ્યું છે, જે Gemini AI પર આધારિત છે. ટૂંક સમયમાં આ ફીચર એન્ડ્રોઇડ યુઝર્સ માટે ઉપલબ્ધ કરાશે.

Google I/O 2024 ઇવેન્ટ દરમિયાન, Google એ જાહેર કર્યું કે Gemini AI ને Google Photos સાથે મર્જ કરવામાં આવ્યું છે. આ ફીચર દ્વારા, તમારા એકાઉન્ટ સાથે લિંક કરેલ Google Photos લાઇબ્રેરીનો કોઈપણ ફોટો અથવા વિડિયો સરળતાથી શોધી શકાય છે. ગૂગલે કહ્યું કે આ AI આધારિત ફીચર તમારા વૉઇસ અથવા ટેક્સ્ટ કમાન્ડના આધારે લાઇબ્રેરીમાંથી એ જ ફોટો શોધી કાઢશે, જે તમે કમાન્ડ આપ્યો છે.

ઉદાહરણ તરીકે, જો તમે તમારી લાઇબ્રેરીમાંથી જૂનો ફોટો જોવા માંગતા હોવ, પરંતુ તમને તે ફોટો અપલોડ કરવાની તારીખ યાદ નથી, તો તમે વૉઇસ કમાન્ડ દ્વારા તે ફોટો શોધી શકશો. તમારે Google Photosના નવા Ask Photos ફીચરનો ઉપયોગ કરવો પડશે. તમે જે ફોટા શોધી રહ્યા છો તેમાં કોણ છે અથવા તે ફોટામાં તમને યાદ છે તે કંઈપણ શોધવા માટે વૉઇસ કમાન્ડ આપો. તમે કમાન્ડ આપતાની સાથે જ આને લગતા કેટલાક ફોટો તમારી સામે ફોનની સ્ક્રીન પર દેખાઈ જશે.

Ask Photos ફીચરનો ડેમો બતાવતી વખતે ગૂગલે કારની લાઇસન્સ પ્લેટનો પ્રોમ્પ્ટ આપ્યો હતો. આપેલા આદેશના આધારે, આ AI ફીચર દ્વારા તે ચોક્કસ કારનો ફોટો મળી આવ્યો હતો. ગૂગલ ફોટોઝના આ ફીચરની મદદથી લાઇબ્રેરીમાંથી ફોટો અને વીડિયો સર્ચ કરી શકાય છે. આ સિવાય ફોટો કે વીડિયોની અપલોડ તારીખ અને સમયના આધારે લાઈબ્રેરીમાં કોઈપણ ફોટો કે વીડિયો સર્ચ કરી શકાય છે. ગૂગલ ફોટોઝનું આ ફીચર આવનારા કેટલાક દિવસોમાં યુઝર્સ માટે રોલઆઉટ કરવામાં આવશે.