અંદાજે ૬૦ લાખ બાળકો સમય પહેલા જ જન્મે છે, અમેરિકાની યુનિવર્સિટી ઓફ કેલિફોર્નિયાના સંશોધકોએ કર્યો હતો દાવો

વાયુ પ્રદૂષણના કારણે લોકોના સ્વાસ્થ્ય પર ગંભીર અસર થઇ રહી છે. માત્ર મૃત્યુ આંક નથી વધ્યો પરંતુ સગર્ભા સ્ત્રીઓ અને તેમના ગર્ભમાં રહેલા બાળકોને પણ પ્રદુષણ અસર કરે છે. વધતા પ્રદૂષણને કારણે, હવા હાનિકારક વાયુઓ અને કણોથી ભરેલી છે, જે જ્યારે આપણે શ્વાસ લઈએ છીએ ત્યારે સીધા આપણા શરીરમાં પ્રવેશ કરે છે. આ કણો માત્ર સામાન્ય લોકો માટે જ હાનિકારક નથી પરંતુ સગર્ભા સ્ત્રીઓ અને તેમના ગર્ભસ્થ બાળકો માટે પણ અત્યંત જોખમી છે. પ્રદૂષણને કારણે પ્રિમેચ્યોર બાળકોની સંખ્યા વધી રહી છે.

તાજેતરના અભ્યાસો દર્શાવે છે કે વધુ પ્રદૂષિત વિસ્તારોમાં રહેતી મહિલાઓને પ્રસૂતિની પીડા વહેલા થવા લાગે છે. આવી સ્થિતિમાં ૯ મહિના પૂરા થતા પહેલા જ બાળકોનો જન્મ થાય છે. પ્રદૂષણમાં હાજર હાનિકારક વાયુઓ અને કણો ગર્ભના વિકાસને અસર કરે છે. જેના કારણે પ્રિમેચ્યોર બાળકોની સંખ્યા સતત વધી રહી છે. એક સંશોધન દર્શાવે છે કે વાયુ પ્રદૂષણને કારણે લગભગ ૬૦ લાખ બાળકો સમય પહેલા જન્મ્યા હતા. આ સંશોધન અમેરિકાની યુનિવર્સિટી ઓફ કેલિફોર્નિયાના સંશોધકોએ કર્યું છે. ઉલ્લેખનીય છે કે આ સંશોધન ૨૦૧૯માં હાથ ધરવામાં આવ્યું હતું. જેનાથી સાબિત થાય છે કે વાયુ પ્રદૂષણ અજાત બાળકોના સ્વાસ્થ્યને પણ નુકસાન પહોંચાડી રહ્યું છે.