રાજકોટના કુવાડવા ગામે બે ભાઈઓની મસ્તીમાં નાનાભાઈના હાથે મોટાભાઈને પડખામાં છરી લાગી ગંભીર હાલતમાં સારવાર માટે ખસેડવામાં આવતા મોત નીપજ્યું હતું. બનાવના પગલે કુવાડવા પોલીસ હોસ્પિટલ ખાતે દોડી ગઈ હતી. પોલીસની પ્રાથમિક તપાસમાં જે 12 વર્ષના તરુણના હાથે છરી લાગી એ માનસિક અસ્વસ્થ હોવાનું સામે આવ્યું છે. યુવાન પુત્રના મોતથી હોસ્પિટલ ખાતે પરિવારમાં કલ્પાંત સર્જાયો હતો.
બનાવની પ્રાપ્ત વિગત મુજબ કુવાડવા ગામે હરિઓમ ચોક પાસે રહેતો પૃથ્વી નાથાભાઈ લઢેર (ઉ.વ.18) નામનો યુવક રાત્રે નવેક વાગ્યે 12 વર્ષીય નાનાભાઈ નીતિન સાથે મશ્કરી કરતો હતો ત્યારે નાનાભાઈના હાથમાં શાકભાજી સુધરવાની છરી હોય જે મશ્કરીમાં મોટાભાઈના પડખામાં મારી દેતા યુવકને લોહી લુહાણ હાલતમાં 108 મારફતે પ્રથમ કુવાડવા અને ત્યાંથી રાજકોટ સિવિલ હોસ્પિટલમાં ખસેડવામા આવ્યો હતો જ્યાં સારવાર કારગત નીવડે પહેલા દમ તોડી દેતા બનાવ અંગે હોસ્પિટલ ચોકીના સ્ટાફે કુવાડવા પોલીસને જાણ કરતા પોલીસ હોસ્પિટલએ દોડી ગઇ હતી અને મૃતદેહનું પીએમ કરાવી જરૂરી કાર્યવાહી કરી હતી.
મૃત્યુ પામનાર પૃથ્વી ચાર ભાઈ એક બહેનમાં બીજા નંબરે હતો અને તેના પીતા નાથાભાઈ ગ્રામપંચાયતમાં કોન્ટ્રાકટ ઉપર કચરાની ગાડી હંકારે છે. માતાનું નામ મંજુલાબેન છે, પરિવારના કહેવા મુજબ નાથાભાઈ લગ્ન પ્રસંગમાં ઢોલ વગડાવા માટે ગયા હતા. માતા મંજુલાબેન ઘરમાં સુતા હતા ત્યારે પૃથ્વી અને નીતિન બંને મશ્કરી કરતા હતા. નીતિનની માનસિક સ્થિતિ બરાબર નથી હાથમાં આવે તેના ઘા કરતો હોય છે, અગાઉ માતાને પણ કાંઈક મારી લેતા માથામાં ઇજા થઇ હતી. આથી ગઈકાલે પણ બંને ભાઈઓ મશ્કરી કરતા હોય ત્યારે હાથમાં શાકભાજી સુધરવાનું ચાકુ આવી જતા પુથ્વીને પડખામાં મારી દીધું હતું. બનાવ અંગે આગળની કાર્યવાહી કુવાડવા પોલીસે હાથ ધરી છે.