રાજકોટ શહેરના મુખ્ય પોશ બજાર વિસ્તાર એવા ડો.યાજ્ઞિક રોડની પથારી ફેરવવામાં મહાપાલિકાની જ મુખ્ય ભૂમિકા છે તેવો આક્રોશ યાજ્ઞિક રોડ સ્થિત વેપારીઓએ આજકાલ દૈનિક સાથેની વાતચીતમાં ઠાલવ્યો હતો, એક સમયે રાજકોટના યાજ્ઞિક રોડની અમદાવાદના સીજી રોડ સાથે સરખામણી થતી હતી. જ્યારે મહાપાલિકાની ઘોર બેદરકારીના પાપે હવે તો એવી હાલત થઇ ગઇ છે કે યાજ્ઞિક રોડ અનેક સમસ્યાઓથી ગ્રસ્ત બની ગયો છે. દરમિયાન તાજેતરમાં સર્વેશ્વર ચોક વોંકળાના કામે યાજ્ઞિક રોડ શનિવારે મધરાતથી બંધ કરાશે તેવું મહાપાલિકા તંત્રએ જાહેર કર્યા બાદ રોડ બંધ તો ન કર્યો ઉલટું છેલ્લા ઘણાં મહિનાઓથી જે ન્યુસન્સ બંધ થયું હતું તે રવિવારી બજારના ફેરિયાઓને યાજ્ઞિક રોડ ઉપર બેસવા દઇને ફરી ન્યુસન્સ તેમજ ટ્રાફિક જામની સમસ્યાનું સર્જન કર્યું હતું.

યાજ્ઞિક રોડ બંધ કરવા મામલે મહાનગરપાલિકા તંત્રનું આયોજન જ અસ્પષ્ટ છે તેથી અમલ થશે ત્યારે શું થશે ? તે કહેવું મુશ્કેલ છે. સર્વેશ્વર ચોક વોંકળાનું કામ ચોમાસા પૂર્વે પૂર્ણ કરવા માટે ઝડપ વધારવા માટે પખવાડિયા પૂર્વે અલગ એજન્સીને કામ અપાયું છે, સરદાર નગર મેઇન રોડથી ન્યુ જાગનાથ પ્લોટ-૨૦ સુધીનો યાજ્ઞિક રોડ બંધ થાય ત્યારબાદની વૈકલ્પિક વ્યવસ્થા અંગેનું પોલીસ કમિશનરનું જાહેરનામું પણ આજથી ૧૦ દિવસ પૂર્વે પ્રસિધ્ધ થઇ ચૂક્યું છે પરંતુ આજ દિવસ સુધી રસ્તો બંધ કરાયો નથી તે હકીકત છે. ખાસ કરીને ગઇકાલે રવિવારની રજાના દિવસે તો આમ પણ યાજ્ઞિક રોડ ઉપરથી રેસકોર્સ જતા-આવતા પરિવારોનો ટ્રાફિક રહેતો હોય છે ત્યારે રવિવારી બજારના ફેરિયાઓને કારણે ટુ વહીલર પસાર કરવું પણ મુશ્કેલ બની જાય છે અને ટ્રાફિક જામ થાય છે.

રાજકોટ મહાનગરપાલિકાના સેન્ટ્રલ ઝોન હેઠળના વોર્ડ નં.૭માં આવેલા સર્વેશ્વર ચોકથી ડો.યાજ્ઞિક રોડને જોડતા હૈયાત વોકળાને ડાયવર્ઝન કરી નવું બોકસ કલ્વર્ટ બનાવવાનું કામ સર્વેશ્વર ચોકમાં પૂર્ણતાની નજીક હોય હવે ત્યાંથી આગળ યાજ્ઞિક રોડ ઉપર નાગરિક બેન્ક પાસે કામ શરૂ થશે. જેથી ડો.યાજ્ઞિક રોડ પર સરદારનગર મેઇન રોડથી ન્યુ જાગનાથ શેરી નં.૨૦ સુધીના રોડ પર વાહનોની અવર જવર આગામી ચાર માસ સુધી બંધ કરવામાં આવશે. આથી ડો.યાજ્ઞિક રોડ ઉપરથી માલવીયા ચોકથી રેસકોર્સ તરફ અવર-જવર માટે સર્વેશ્વર ચોક ખાતે પોલીસ કમિશનર દ્વારા પ્રતિબંધ તથા વૈકલ્પિક વ્યવસ્થાઓ જાહેર કરવામાં આવી છે જે નીચે મુજબ છે.

યાજ્ઞિક રોડથી રેસકોર્સ તરફ આવતા તમામ પ્રકારના વાહનો ડો.દસ્તૂર માર્ગ પરથી એસ્ટ્રોન ચોક-મહિલા કોલેજ ચોક તરફથી કિશાનપરા ચોક-જિલ્લા પંચાયત ચોક પર તથા રામકૃષ્ણ આશ્રમથી ડો.યાજ્ઞિક રોડ ઉપર હાઇસ્ટ્રીટ બિઝનેસ થી ડાબી તરફ શ્રી સ્વામી વિવેકાનંદ માર્ગ પર રામકૃષ્ણનગર શેરી નં.૧૦ પરથી પસાર થઇ વિરાણી હાઇસ્કુલ પાસેથી- ટાગોર રોડ પર થઇને એસ્ટ્રોન ચોક-મહિલા કોલેજ-કિશાનપરા ચોકથી જિલ્લા પંચાયત ચોક સુધી જઇ શકાશે.

રેસકોર્ષથી માલવિયા ચોક તરફ આવતા મોટર વ્હીકલ વિગેરે વાહનોની અવર જવર બહુમાળી ભવનથી જિલ્લા બેન્ક ભવન ચોકથી જ્યુબેલી ગાર્ડન ચોક- જવાહર રોડ ઉપરથી ત્રિકોણ બાગ સર્કલથી માલવીયા ચોક તથા રેસકોર્ષથી માલવીયા ચોક તરફ આવતા ટુ-વ્હીલર્સ તથા થ્રી-વ્હીલર જિલ્લા પંચાયત ચોકથી ફુલછાબ ચોક- મોટી ટાંકી ચોક- લીમડા ચોકથી પસાર થઇને ડો.રાજેન્દ્રપ્રસાદ રોડથી પસાર થઇ માલવીયા ચોક તરફ જઈ શકશે.

ડો.યાજ્ઞિક રોડ પરથી માલવીયા ચોકથી રેસકોર્સ તરફ અવર-જવર માટે સર્વેશ્વર ચોક ખાતે પોલીસ કમિશનર બ્રિજેશ કુમાર ઝા દ્વારા વૈકલ્પિક વ્યવસ્થાઓ જાહેર કરવામાં આવી છે જે અંતર્ગત સર્વેશ્વર ચોક ખાતે આવેલ બંને સાઇડના રસ્તા ૫૦-૫૦ મીટર બંધ કરવામાં આવશે. સર્વેશ્વર ચોકની આસપાસની દુકાન-ઓફિસની પાર્કીંગની અલાયદી વ્યવસ્થા કરવામાં આવશે અને વ્યાપારી-ગ્રાહકોની અવર-જવર માટે રસ્તો ચાલુ રહેશે જયાં ગાડીઓનું પાર્કીંગ કરી શકાશે.

દબાણ હટાવ શાખાનો સ્ટાફ હપ્તા લ્યે છે: વેપારીઓ
યાજ્ઞિક રોડ ઉપર દુકાનો-શોરૂમ ધરાવતા વેપારીઓનો એવો આક્ષેપ છે કે દબાણ હટાવ શાખાનો સ્ટાફ હપ્તા લઇને દર રવિવારે યાજ્ઞિક રોડ ઉપર ફેરિયાઓની રવિવારી બજારને બેસવા આંખ આડા કાન કરી ગેરકાનૂની મંજૂરી આપે છે. અનેક વખત ફરિયાદો કરવા છતાં અધિકારીઓ કે પદાધિકારીઓ પણ આ પ્રશ્ન ઉકેલી શક્યા નથી.

અંતે આવતીકાલે મંગળવારે મધરાતથી યાજ્ઞિક રોડ બંધ કરાશે: સિટી ઇજનેર

રાજકોટ મહાપાલિકાના સેન્ટ્રલ ઝોનના સિટી ઇજનેર એ.એ.રાવલએ આજકાલ દૈનિક સાથેની વાતચીતમાં જણાવ્યું હતું કે અગાઉ શનિવારથી યાજ્ઞિક રોડ બંધ કરવા નિર્ણય કરાયો હતો પરંતુ જાગનાથ પ્લોટની શેરીઓમાં પાણીની ડીઆઇ લાઈન નાખવા માટેનું ખોદકામ ચાલુ હોય આ નિર્ણય ૭૨ કલાક પૂરતો પાછો ઠેલીને હવે આવતીકાલે તા.૧૫ને મંગળવારે રાત્રે ૧૨ કલાકથી બંધ કરવાનો ફાઇનલ નિર્ણય કર્યો છે.