રાજકોટ શહેરના રામનાથપરા ગરૂડ ગરબી ચોકમાં માદક પદાર્થની હેરફેર થતી હોવાની માહિતી મળતા એ ડિવિઝન પોલીસે દરોડો પાડી ચાર કિલો ગાંજા સાથે મહિલા અને બોટાદના બે પેડલેરને ઝડપી લીધા હતાં. પોલીસે રૂ.૩.૩૪ લાખનો ગાંજાનો આ જથ્થો કબજે કર્યો હતો. ગાંજા સાથે ઝડપાયેલી શબુ અગાઉ હત્યાના ગુનામાં પોલીસ ચોપડે ચડી ચૂકી હોવાનું માલુમ પડયું છે.શહેર પોલીસ કમિશનર બ્રજેશકુમાર ઝા, એડી. સીપી ચૈતન્ય માંડલીક, ડીસીપી હેતલ પટેલના માર્ગદર્શન હેઠળ શહેરમાંથી નશાના દૂષણને નાબૂદ કરવા ખાસ ઝુંબેશ ચલાવવામાં આવી રહી છે. શે નો ટુ ડ્રગ્સ મિશન અંતર્ગત નાર્કોટિક્સ પદાર્થોનું વેચાણ અને સેવન કરનારાઓ વિરુદ્ધ કડક કાર્યવાહી કરવાની આપેલ સૂચનાના પગલે એ-ડિવિઝન પોલીસ મથકના પીઆઈ જે.વી.વાઢિયાની રાહબરીમાં પીએસઆઇ એસ.એમ.રાણા અને ટીમ પેટ્રોલીંગમાં હતી. દરમિયાન હેડ કોન્સ્ટેબલ કરણભાઈ વિરસોડીયા, સાગરભાઈ માવદીયા, ધર્મેશભાઈ પરમાર અને ધર્મેશભાઈ ખાંડેખાને રામનાથપરા ગરુડ ગરબી ચોક નજીક વીરાણી વાડી પાસે જાહેર રોડ પરથી ગાંજાના જથ્થા સાથે મહિલા સહિત ત્રણ શખ્સો ઉભા છે તેવી બાતમી મળી હતી. જેથી પોલીસે દરોડો પાડી ત્રણેય શખસોને પકડી પાડી ૪.૦૯૯ કિલો ગ્રામ ગાંજો કિં.રૂ. રૂ.૨,૦૪,૯૫૦, મોબાઈલ ફોન અને એક સીએનજી ઓટો રીક્ષા મળી કુલ રૂ.૩.૩૪ લાખનો મુદામાલ કબ્જે કર્યો હતો.