યુપી સરકારે બાળકોનો કાઉન્સેલિંગ રિપોર્ટ રજૂ કરવાનો આદેશ

​​​​​​​ભોગ બનનાર બાળકને અન્ય શાળામાં દાખલ કરવાનું સુચન

ઉત્તર પ્રદેશના મુઝફ્ફરનગરમાં આવેલી એક સ્કૂલનો વીડિયો ગયા મહિને વાયરલ થયો હતો. જેમાં એક મહિલા શિક્ષિકા મુસ્લિમ બાળક પર ધર્મના આધારે દ્વેષપૂર્ણ ટિપ્પણી કરતી જોવા મળી હતી. આ મામલે આજે સુપ્રીમ કોર્ટમાં સુનાવણી થઈ હતી. કોર્ટે આ કેસમાં દાખલ કરવામાં આવેલી એફઆઈઆર પર સવાલો ઉઠાવ્યા હતા, જેમાં પીડિત વિદ્યાર્થીના પિતાનું નિવેદન હોવા છતાં તે નોંધવામાં આવ્યું ન હતું કે બાળકને ધર્મના કારણે માર મારવામાં આવ્યો હતો. કોર્ટે આ કેસની તપાસ વરિષ્ઠ આઈપીએસ અધિકારીની દેખરેખ હેઠળ કરવાનો આદેશ આપ્યો છે.

કોર્ટે ઉત્તર પ્રદેશ સરકારને એક અઠવાડિયાની અંદર આઈપીએસ અધિકારીની નિમણૂક કરવા જણાવ્યું છે. અધિકારીએ તપાસ રિપોર્ટ સીધો કોર્ટમાં રજૂ કરવાનો રહેશે. આ સાથે, સરકારે ત્રણ અઠવાડિયામાં રિપોર્ટ સબમિટ કરવાનો રહેશે.

સુપ્રીમ કોર્ટની બેન્ચે આ કેસમાં સામેલ બાળકોના કાઉન્સેલિંગ વિશે પણ પૂછ્યું હતું. કોર્ટે પ્રશ્ન કર્યો કે મુસ્લિમ બાળકનું કાઉન્સેલિંગ થયું કે નહીં? જે બાળકો મુસ્લિમ બાળકો હતા તેમને કાઉન્સિલિંગ મળ્યું કે નહીં? જેના જવાબમાં ઉત્તર પ્રદેશ સરકારે કોર્ટને કહ્યું કે બાળકોનું કાઉન્સેલિંગ કરવામાં આવ્યું છે, જે બાદ બેંચે યુપી સરકારને કાઉન્સેલિંગ રિપોર્ટ પણ કોર્ટમાં સબમિટ કરવાનો આદેશ આપ્યો.

વાયરલ વીડિયો કેસમાં બેન્ચે રાજ્ય સરકારને એનસીપીસીઆરની માર્ગદર્શિકા પર રિપોર્ટ રજૂ કરવા કહ્યું છે. સુપ્રીમ કોર્ટે કહ્યું કે આ મામલો મૂળભૂત અધિકારોનું ઉલ્લંઘન છે. કોર્ટે રાજ્યમાં બાળકોને અપાતા શિક્ષણની ગુણવત્તા પર પણ સવાલો ઉઠાવ્યા હતા. કોર્ટે કહ્યું કે જો આરોપો સાચા છે તો આ કેવી શિક્ષણ વ્યવસ્થા છે? આ સાથે સુપ્રીમની બેન્ચે પીડિત બાળકને શિક્ષણના અધિકાર હેઠળ ગુણવત્તાયુક્ત શિક્ષણ આપવાનો આદેશ આપ્યો હતો અને સ્પષ્ટ કર્યું કે બાળકને અલગ શાળામાં રાખવામાં આવે.

સુપ્રીમ કોર્ટે કહ્યું કે રાજ્ય સરકારે પીડિતાના બાળકની જવાબદારી લેવી, આ ગંભીર બાબત છે હળવાશથી ન લેવી. આ ઉપરાંત કોર્ટે પૂછ્યું કે સાક્ષીઓને શું રક્ષણ આપવામાં આવ્યું છે. આ મામલે સુપ્રીમ કોર્ટે પહેલા જ યુપી સરકારને નોટિસ પાઠવી છે. આ મામલે નોટિસ જારી કરીને સુપ્રીમ કોર્ટે યુપી સરકારને પૂછ્યું હતું કે આ મામલે શું કાર્યવાહી કરવામાં આવી. હવે આ કેસની આગામી સુનાવણી ૩૦ ઓક્ટોબરે થશે.