આજે શારદીય નવરાત્રીનો પવિત્ર તહેવાર સમાપ્ત થશે. દુર્ગા વિસર્જનનો દિવસ વિજયાદશમી પણ છે. તે જ દિવસે રાવણ દહન નિમિત્તે દશેરાનો તહેવાર પણ ઉજવવામાં આવે છે. પરંતુ  ઘણા લોકોને વિજયાદશમી અને દશેરા વચ્ચેનો તફાવત ખબર નથી. જેના કારણે મોટાભાગના લોકો બંનેને એક જ તહેવાર માને છે. ચાલો જાણીએ આ બે વચ્ચેનો તફાવત શું છે.

દર વર્ષ અશ્વિન મહિનાના શુક્લ પક્ષની દશમી તિથિએ વિજયાદશમી અને દશેરાનો તહેવાર ઉજવવામાં આવે છે. નવરાત્રી તહેવાર મા દુર્ગાના વિસર્જન સાથે સમાપ્ત થશે અને તે જ દિવસે રાવણનું દહન પણ કરવામાં આવશે. આ બંને તહેવારો એક જ દિવસે આવતા હોવાથી લોકો તેને એક જ માને છે. જ્યારે કે આવું બિલકુલ નથી. આ બંને તહેવારો અલગ અલગ છે.

વિજયાદશમી અને દશેરા વચ્ચેનો તફાવત

વિજયાદશમી શું છે?

પૌરાણિક ગ્રંથો અનુસાર, જ્યારે મહિષાસુર નામના રાક્ષસે પૃથ્વીથી લઈને સ્વર્ગ સુધી પોતાના અત્યાચારોથી બધાને પરેશાન કર્યા હતા, ત્યારે માતા દુર્ગાએ મહિષાસુર અને તેની સેના સાથે 9 દિવસ સુધી ભયંકર યુદ્ધ કર્યું હતું. યુદ્ધના 10મા દિવસે માતા દુર્ગાએ મહિષાસુર અને તેની સેનાનો નાશ કર્યો હતો. ત્યારથી માતા દુર્ગાના આ વિજયને વિજયાદશમી તરીકે ઓળખવામાં આવે છે.

શું છે દશેરા?

દશેરા વિશે પૌરાણિક ગ્રંથો જણાવે છે કે આ દિવસે શ્રી રામજીએ રાવણનો વધ કર્યો હતો. રાવણને હરાવવા માટે રામજીએ 9 દિવસ સુધી મા દુર્ગાની પૂજા કરી હતી. જે બાદ રામજીએ દસમા દિવસે રાવણનો વધ કર્યો હતો. રામજી અને રાવણ વચ્ચેના યુદ્ધમાં દેવતાનો વિજય થયો. આ કારણોસર, નવરાત્રિના 9 દિવસ દરમિયાન વિવિધ સ્થળોએ રામલીલાનું આયોજન કરવામાં આવે છે અને દસમા દિવસે રાવણ, કુંભકર્ણ અને મેઘનાદના પૂતળાં બાળીને દશેરાનો તહેવાર ઉજવવામાં આવે છે.